Reykjavíkurborg leggst gegn tillögu um að útivistartími barna á aldrinum 10 til 12 ára verði lengdur um eina klukkustund yfir vetrartímann. Þetta kemur fram í umsögn borgarinnar um drög að frumvarpi um breytingu á barnaverndarlögum.
Inga Sæland, mennta- og barnamálaráðherra, kynnti frumvarpsdrögin í samráðsgátt stjórnvalda í sumar. Samkvæmt gildandi reglum mega börn 12 ára og yngri vera úti til klukkan 20 yfir vetrartímann en ungmenni á aldrinum 13 til 16 ára til klukkan 22.
Í frumvarpsdrögunum er lagt til að börn níu ára og yngri megi áfram vera úti til klukkan 20 en útivistartími barna á aldrinum 10 til 12 ára verði lengdur til klukkan 21. Reglur fyrir 13 til 16 ára yrðu óbreyttar.
Reykjavíkurborg vísar meðal annars til forvarnargildis núverandi reglna og bendir á að skipulagt íþrótta- og tómstundastarf fari almennt ekki fram svo seint að kvöldi.
„Með breytingunni er því verið að lengja þann tíma sem börn geta verið á almannafæri án eftirlits fullorðinna, sem getur aukið líkur á áhættuhegðun,“ segir í umsögninni.
Borgin styður hins vegar að sumartími reglnanna hefjist 1. júní í stað 1. maí og verði þannig betur tengdur skólaárinu.
