Það þykir vera mikið áfall fyrir fjölmiðlun á Íslandi þegar stjórnendur Sýnar hafa lokað fréttastofu Stöðvar 2. Í gegnum tíðina hafa fréttamenn þar staðið sig prýðilega og gjarnan komið fram með mál sem skipt hafa miklu. Hlutleysi hefur gjarnan verið einkenni frétta þar. Nú hafa áhugamenn um fjölmiðla þungar áhyggjur af Morgunblaðinu sem hefur verið þungur baggi á Guðbjörgu Matthíasdóttur, auðkonu í Vestmannaeyjum, og Kaupfélagi Skagfirðinga undir stjórn Þórólfs Gíslasonar. 

Blaðamenn Morgunblaðsins verða seint sakaðir um að vera hlutlausir í skrifum sínum. Baráttan um aðildarviðræður að Evrópusambandinu leiddi það skýrt í ljós. Hermt er að nokkur fjöldi áskrifenda hafi hrakist á brott í þeim átökum en þar hafi ekki verið af miklu að taka eftir nokkra óáran í rekstrinum. Nú leiða einhverjir að því getum að það styttist í að Morgunblaðið hætti að koma út á pappír enn það veltur þó væntanlega á djúpum vösum auðkonunnar og kaupfélagsstjórans og viljanum til að halda lífi í forneskjunni ...