Rúmenskur maður hefur verið ákærður af lögreglustjóranum á Suðurnesjum fyrir hylmingu eftir að fjöldi stolinna muna fannst í fórum hans við tollskoðun í Flugstöð Leifs Eiríkssonar.

Samkvæmt ákæru var maðurinn á leið úr landi laugardaginn 9. nóvember 2024 þegar hann var stöðvaður við tollskoðun. Þar reyndist hann hafa í fórum sínum rúmlega 20 muni sem ákæruvaldið segir að hafa verið stolið og telur að honum hafi hlotið að vera ljóst að um þýfi væri að ræða.

Meðal munanna voru fatnaður og skór, rúmföt, verkfæri og ýmis konar verkfærabúnaður. Þar á meðal voru vörur frá Icewear, Jysk, Louis Vuitton, Milwaukee, Würth og Stanley. Um var að ræða meðal annars úlpur, jakka, peysur, skó, borvél, skrúfvél, rafhlöður, málbönd og skrúfbitasett.

Ákæruvaldið telur að maðurinn hafi með því að hafa munina í fórum sínum haldið þeim ólöglega frá réttmætum eigendum þeirra.

Háttsemin er talin varða við ákvæði almennra hegningarlaga um hylmingu, en til vara ákvæði laganna um þjófnað. Þess er krafist að maðurinn verði dæmdur til refsingar og greiðslu alls sakarkostnaðar.

Málið verður tekið fyrir í Héraðsdómi Reykjaness 8. október næstkomandi.