Fjölmiðlamaðurinn Helgi Seljan gagnrýnir harðlega ákvörðun um að hætta fréttaútsendingum Stöðvar 2 og segir lokun fréttastofunnar marka mikil tímamót í íslenskri fjölmiðlasögu. Þetta kemur fram í ítarlegri færslu sem Helgi birtir á Facebook.

Helgi segir fréttastofu Stöðvar 2 hafa gegnt lykilhlutverki í íslenskri fjölmiðlun allt frá stofnun hennar fyrir fjörutíu árum. Að hans mati hafi tilkoma fréttastofunnar leitt til mikilla framfara í íslenskri blaðamennsku og jafnframt veitt öðrum fjölmiðlum, ekki síst RÚV, mikilvægt aðhald.

„Fréttastofan hefur síðan, oft verið leiðandi í gagnrýninni blaðamennsku en líka séð til þess að halda keppinautum sínum – þá helst RÚV – við efnið,“ skrifar Helgi.

Hann þekkir starfsemina af eigin raun en starfaði á fréttastofunni í tvö ár fyrir um tveimur áratugum. Þar hafi starfað reynslumikið fagfólk sem hafi lagt áherslu á gagnrýna og aðgangsharða blaðamennsku.

Helgi beinir jafnframt sjónum að eigendum Sýnar undanfarin ár og sérstaklega aðkomu íslenskra lífeyrissjóða. Hann nefnir meðal annars Lífeyrissjóð verslunarmanna, Gildi, Lífeyrissjóð starfsmanna ríkisins og Birtu og gagnrýnir að þeir hafi fylgst með þróun fyrirtækisins án þess að koma í veg fyrir þá stöðu sem nú sé komin upp.

Hann segir sjónvarpsfréttastofu vissulega ekki vera auðveldan eða sérstaklega arðbæran rekstur en telur jafnframt að ýmsar ákvarðanir hafi verið teknar í rekstri fyrirtækisins undanfarinn áratug sem vert sé að gagnrýna.

Helgi segir sérstaklega kaldhæðnislegt að Lífeyrissjóður verslunarmanna sé lífeyrissjóður margra þeirra blaðamanna sem nú hafi misst störf sín.

Í lok færslunnar beinir Helgi orðum sínum að fyrrverandi samstarfsfólki sínu sem annaðhvort hafi verið sagt upp eða sitji áfram eftir á fréttastofunni við breyttar aðstæður.

„Ég hef að vísu borgað í þrjá af þessum lífeyrissjóðum – sem eiga eða áttu ykkur, svo kannski fer bara best á því ég biðji ykkur afsökunar,“ skrifar Helgi og lýkur færslunni á spurningunni:

„Og hvað nú?“