Fjölmiðlamaðurinn Stefán Einar Stefánsson er allt annað en sáttur við Kvennaverkfallið 2025 sem haldið verður á föstudaginn og hefur hann meðal annars kallað verkfallið „trúðasýningu,“ og hvatti þá sem standa á bakvið verkfallið til að hætta við það og bætti í á samfélagsmiðlum.
Facebook póstur Stefáns
Þennan póst fékk ég sendan frá skóla barnanna minna fyrr í dag. Þar segir að Garðabær styðji jafnréttisbaráttu kvenna og kynseginfólks.
Og þar er bent á að verkfall hafi verið boðað 24. október næstkomandi.
Nú eru í gildi lög í landinu um verkfallsboðanir og verkfallsaðgerðir. Hefur þeim lögum verið fylgt við boðun þessarar vinnustöðvunar?
Og ef Garðabær stendur með konum og kvárum, þá má eins spyrja, stendur bærinn með börnum bæjarins og foreldrum þeirra? - Hvað segir þú Almar Guðmundsson?
Ég held að það sé löngu kominn tími til þess að hætta þeim fíflagangi sem hér veður uppi og segja hlutina eins og þeir eru. Aðgerðir af þessu tagi eru algjör tímaskekkja í nútímasamfélagi og gera í raun lítið úr konum fremur en hitt.
Ég styð jafnréttisbaráttuna af heilum hug og er tilbúinn að leggja öll þau lóð á vogarskálarnar sem ég get í því efni. En mér er óljúft að sitja undir þessu - og ég veit að það sama gildir um ótrúlegan fjölda fólks af báðum kynjum.
Vandinn er sá að fólk þorir ekki að segja hug sinn. Af hverju ekki? Því þá kemur liðið með heykvíslarnar og stimplana og spyr með þjósti: ertu á móti jafnrétti? ertu á móti konum? Hvað er eiginlega að þér?
Svörin eru einföld: Nei, nei og ekkert.
Kröfur Kvennaárs, sem standa fyrir verkfallinu, eru kröfur og aðgerðir sem stjórnvöld geta komið í framkvæmd að mati Kvennaárs og myndu þær aðgerðir taka stór skref í átt að jafnrétti. Þær eru í þremur flokkum; launamisrétti kynjanna, ólaunuð vinna kvenna og kynbundið ofbeldi.
Eins og frægt er var Stefán Einar kjörinn formaður VR árið 2011. Hann hlaut 20,6 prósent atkvæða í kosningu þar sem sjö voru í framboði sem dugði til sigurs. Í næstu kosningum, sem fóru fram árið 2013, tapaði hann með miklum mun fyrir Olafíu B. Rafnsdóttur.
Í framboðsbæklingi sem VR gaf út sagði fjölmiðlamaðurinn eftirfarandi:
„Taka þarf harðar á því siðferðislega vandamáli sem launamunur kynjanna er. Það er ólíðandi að 10% munur mælist milli kynjanna. Ég kynni nýjar leiðir til þess að sporna gegn þessu vandamáli.“
Ekki er víst hvort Stefán Einar telji að þessi launamunur sé ekki lengur til staðar eða hvort hann einfaldlega skipt um skoðun í þessum efnum.
