Vopnaðir menn rændu 46 manns, flestum þeirra börnum, í árásum á þrjá skóla í suðvesturhluta Nígeríu á föstudag. Þetta staðfesti kristnu samtökin Christian Association of Nigeria (CAN) á mánudag.

Að sögn Elisha Olukayode Ogundiya, formanns CAN í Oyo-ríki, voru flest fórnarlambanna börn á aldrinum tveggja til sextán ára. Árásirnar voru gerðar samtímis á nokkra mismunandi skóla.

Lögregla lýsti árásunum sem samræmdum aðgerðum og sagði að byssumennirnir hefðu rænt nemendum, starfsfólki og meðal annars aðstoðarskólastjóra eins skólans.

Nígería hefur um árabil glímt við glæpagengi, svokallaða „bandíta“, sem stunda mannrán gegn lausnargjaldi og herja einkum á dreifbýl svæði. Flest slík mál hafa þó hingað til verið bundin við norður- og miðhluta landsins þar sem óstöðugleiki hefur verið mestur.

Í kjölfar árásanna fyrirskipuðu skólayfirvöld í Oyo-ríki tímabundna lokun nærliggjandi skóla á föstudag til að tryggja öryggi og gefa öryggissveitum svigrúm til að ná stjórn á ástandinu. Yfirvöld hafa síðan ákveðið að skólarnir skuli opna aftur í dag, mánudag.