Taílenska lögreglan hefur handtekið tvo menn sem játuðu að hafa myrt rússnesk systkini sem höfðu verið saknað í nokkra daga.
Hin 22 ára gamla Diana Nazimova og 17 ára bróðir hennar, Roman Nazimov, hurfu aðfaranótt 26. júlí í Pattaya. Móðir þeirra, Zarina Nazimova, tilkynnti um hvarfið eftir að myndavélar sýndu þau síðast aka á mótorhjóli um klukkan fjögur um nóttina.
„Börnin mín hurfu í Pattaya í nótt. Eftir að þau sáust síðast á mótorhjólinu hefur ekkert spurst til þeirra og það er slökkt á símum þeirra,“ skrifaði hún á Instagram.
Samkvæmt kunningjum systkinanna hafði fjölskyldan flutt frá Rússlandi til Taílands fyrir fimm árum. Daginn áður en hún hvarf sagði Diana móður sinni að iPhone-sími hennar hefði varað við óþekktu Bluetooth-rakningartæki í nágrenninu og að hún hefði á tilfinningunni að einhver væri að elta hana.
Leitarmenn fundu síðar mótorhjólið sem systkinin höfðu verið á. Samkvæmt taílenskum fjölmiðlum hafði því verið tekið í sundur og það grafið í kirkjugarði.
Lögreglan handtók upphaflega tvo menn sem grunaðir voru um að hafa aðstoðað ræningjana, en þeim var sleppt eftir að þeir neituðu sök.
Daginn eftir voru tveir aðrir menn, 43 ára og 39 ára, handteknir. Samkvæmt taílenska miðlinum Khaosod játuðu þeir við yfirheyrslur að hafa orðið systkinunum að bana.
Mennirnir sögðust hafa ætlað að stela mótorhjóli systkinanna. Þegar þau veittu mótspyrnu hafi þeir skotið Roman til bana og barið Dianu svo illa að hún lést af áverkunum. Að því loknu hafi þeir flutt lík þeirra og grafið í fjalllendi í Chonburi-héraði.
