Bandarískur hermaður fannst látinn eftir umfangsmikla leit í kjölfar þess að tveir bandarískir hermenn hurfu á meðan á alþjóðlegri heræfingu stóð í suðurhluta Marokkó, að því er marokkóski herinn greindi frá á sunnudag.

Hermennirnir hurfu fyrir rúmri viku nærri klettabelti við Atlantshafsströndina á meðan þeir tóku þátt í heræfingunni African Lion 2026 á Cap Draa-svæðinu. Í kjölfarið hófst umfangsmikil leit á landi, í lofti og á sjó með þátttöku bandaríska hersins, marokkóskra yfirvalda og bandalagsríkja.

Í tilkynningu frá marokkóska hernum kemur fram að lík annars hermannsins hafi fundist í sjónum á laugardag. Lík hans var flutt á hersjúkrahús þar sem unnið er að undirbúningi heimflutnings. Leit að hinum hermanninum stendur enn yfir.

Embættismaður innan bandaríska hersins sagði í samtali við AFP-fréttastofuna að talið væri líklegt að hermennirnir hefðu fallið í sjóinn og að um slys hefði verið að ræða. Þá væri ekkert sem benti til hryðjuverka.

Samkvæmt upplýsingum frá bandarísku Afríkuherstjórninni náði leitarsvæðið yfir meira en 8.000 ferkílómetra af hafi og strandlengju. Meira en tíu loftför tóku þátt í leitinni auk marokkóskra kafara og ómannaðs neðansjávarfars.

Heræfingin African Lion 2026 er ein stærsta fjölþjóðlega heræfing sem haldin er í Afríku og tóku nærri 5.000 hermenn frá yfir 40 ríkjum þátt í henni ásamt sérfræðingum á sviði öryggis- og varnarmála.