Hrollvekjandi upptökur sýna augnablikið þegar ungur ökumaður rafhjóls flúði vettvang eftir að hafa ekið á og banað langömmu á gangbraut.

Billy Stokoe, 19 ára, var dæmdur í sex ára og níu mánaða fangelsi eftir að hafa ekið á Gloriu Stephenson, 86 ára, á miklum hraða í Sunderland þann 16. maí í fyrra.

Við slysið var Stokoe undir áhrifum kannabisefna og las skilaboð í farsíma sem hann hélt á í vinstri hendi, sem kom í veg fyrir að hann gæti notað bremsuna. Áreksturinn var svo harður að Stephenson lést samstundis.

Öryggismyndavélar við götuna náðu því þegar Stokoe skall á konunni og kastaðist af öflugu Sur-Ron Light Bee X rafhjóli sínu, sem kostaði um 4.000 pund (659 þúsund krónur) en því var ekið ólöglega á almennum vegum. Á upptökunum sést hann taka af sér lambhúshettu, hlaupa að konunni þar sem hún lá á götunni og stuttu síðar stökkva aftur á hjólið og flýja vettvang.

Lögregla handtók hann síðar eftir að móðir hans fór með hann á lögreglustöð til að gefa sig fram. Fyrstu orð hans við lögreglu voru: „Er hún dáin?“

Við dómsuppkvaðningu fyrir Newcastle Crown Court á föstudag játaði hann sök fyrir hættulegan akstur sem leiddi til dauða, akstur án ökuréttinda og akstur ótryggðs ökutækis.

Hann mun geta sótt um reynslulausn eftir að hafa afplánað helming refsingarinnar og verður sviptur ökurétti í fimm ár eftir lausn úr fangelsi.

Fjölskylda Stephenson lýsti hinum átakanlega missi „fallegrar, gáfaðrar og afar sjálfstæðrar“ langömmu með „mikla lífsgleði“. Stephenson, sem hafði orðið ekkja þrisvar sinnum, hafði átt farsælan feril innan breska heilbrigðiskerfisins. Hún hafði eignast fjögur börn og át 13 barnabörn.

Dætur hennar sögðu hana hafa verið hrausta og virka og að hún hefði verið á leið í frí til Lanzarote þar sem hún ætti stóran vinahóp. Hún hafi verið að ganga með hund dóttur sinnar til að ná markmiði sínu um 10 þúsund skref á dag þegar slysið varð.

Dóttir hennar, Lisa Trench, sagði fyrir dómi:

„Þú, á ólöglega hjólinu þínu. Þú, á ofsahraða. Þú, í símanum. Þú, undir áhrifum kannabis. Mamma átti aldrei möguleika.“

Önnur dóttir, Julie Francis, gagnrýndi Stokoe harðlega fyrir að hafa flúið vettvang.

„Hann hljóp burt og skildi hana eftir eins og hún væri ekki neitt. Hann er hugleysingi sem hugsaði aðeins um sjálfan sig. Hann skildi hana eftir eina til að deyja eins og rusl í ræsinu,“ sagði hún.

Fjölskyldan gagnrýndi einnig skort hans á iðrun og benti á að aðeins átta dögum eftir dauða Stephenson hefði hann farið á Wembley-leikvanginn til að horfa á Sunderland spila og síðar óskað eftir breytingu á skilorði sínu svo hann gæti farið í utanlandsferð.

Lögreglan í Northumbria sagði að Stokoe hefði sést aka hættulega um götur Sunderland fyrr sama dag og sveigja á milli bíla á miklum hraða.

„Þetta var slys sem beið eftir að gerast,“ sagði rannsóknarstjórinn Billy Mulligan hjá lögreglunni og bætti við að hjólin gætu farið úr 0 í 60 mílur á klukkustund hraðar en flestir bílar.

Hann sagði upptökur sýna Stokoe aka án þess að halda í stýrið, án þess að nota bremsur og sveigja á milli bíla áður en hann ók á Stephenson á gangbrautinni.

„Á meðan vegfarendur reyndu að hjálpa Gloriu steig hann aftur á hjólið og yfirgaf svæðið,“ sagði Mulligan.