Fallegt og vel skipulagt einbýlishús við Baughús 14 í Grafarvogi hefur verið sett á sölu á 144,9 milljónir króna.

Um er að ræða tveggja hæða hús, byggt árið 1991, með tvöföldum bílskúr og heildarstærð skráðri 228,2 fermetrar samkvæmt Þjóðskrá.

Íbúðarhluti eignarinnar er skráður 178,2 fermetrar en bílskúrinn 50 fermetrar. Húsið hefur að geyma fjögur rúmgóð svefnherbergi, baðherbergi, gestasnyrtingu, sér þvottahús, sjónvarpshol og stórar og bjartar stofur. Á efri hæð er mikil lofthæð sem skapar rúmgott og opið rými. Þá er möguleiki á að stúka sjónvarpshol á neðri hæð af og útbúa þannig fimmta svefnherbergið.

Viðhald eignarinnar hefur verið gott en húsið og gluggar voru máluð að utan árið 2025. Lóðin er falleg og gróin, með timburverönd sem snýr í suður og býður upp á skjólgott útivistarsvæði.

Eignin er staðsett í fjölskylduvænu og rótgrónu hverfi í Grafarvogi þar sem stutt er í helstu þjónustu, skóla og leikskóla. Í næsta nágrenni eru einnig afþreyingar- og verslunarmöguleikar, þar á meðal Egilshöll og verslunarkjarninn Spöngin.

Um er að ræða vel staðsetta og rúmgóða eign sem hentar vel fyrir fjölskyldur sem leita að þægilegu húsnæði í grónu hverfi.