Bunny Ears
Fyrrverandi barnastjarnan Macaulay Culkin sem glímdi við fíkniefnavanda í mörg ár er nú kominn á beinu brautina og farinn af stað með nýtt skemmtilegt hlaðvarp, Bunny Ears. Í hlaðvarpinu spjallar Culkin á kaldhæðnislegum nótum við þekkta skemmtikrafta um allt milli himins og jarðar, allt frá tölvuleikjum til detox-kúra.
You must remember this
Ertu kvikmyndanörd? Þá áttu eflaust eftir að fíla hlaðvarpið You must remember this en í því skyggnist stjórnandi þess, Karina Longworth, á bakvið gláfægða ímynda Hollywood og fer yfir ótrúlega, undarleg og grimmileg atvik sem hafa átt sér stað í mekka bandarískrar kvikmyndagerðar.
Stranglers
Í Stranglers er rakið mál eins frægasta raðmorðingja sögunnar, Alberts DeSalvo, sem myrti 13 konur í Boston á sjötta áratugnum. DeSalvo, betur þekktur sem The Boston Strangler, komst inn á heimili fórnarlamba sinna undir því yfirskini að hann þyrfti að lesa af mælum og drap þau svo á hrottafenginn hátt.
The Hilarious World of Depression
Í hlaðvarpinu The Hilarious World of Depression ræða þekktir grínistar á opinskáan og einlægan hátt um þunglyndi sitt með það fyrir augum að uppræta fórdóma gegn andlegum veikindum. Grínistarnir miðla af reynslu sinni af glímunni við „svarta hundinn“ og gefa ráð sem gætu gagnast hlustendum.
Soundtracking
Soundtracking fjallar á áhugaverðan hátt um tónlist í kvikmyndum en í því fær stjórnandi þess til sín kvikmyndaleikstjóra til að segja frá tónlistinni sem þeir völdu í kvikmyndir sínar og ástæðurnar sem liggja að baki þeirri ákvarðanatöku. Meðal gesta er Edgar Wright sem notaði í mynd sína Baby Driver upprunalegar útgáfur laga sem eru fremur þekkt í endurflutningi stórstjarna í tónlistarbransanum.
Athugasemdir