Fimm leiðir til að auka vellíðan heimavið

Góður ilmur

Upplifun okkar á rýmum ein­skorð­ast ekki aðeins við hið sjón­ræna. Hljóð og lykt skiptir einnig miklu máli og eru minn­ingar okkar margar hverjar tengdar lykt. Ilmkerti og ilmol­íu­lampar með hreinum ilm­kjarna­ol­íum geta bætt and­lega heilsu og gert and­rúms­loftið á heim­il­inu betra.

Góður ilmur gefur réttu stemn­ing­una. Þessi fal­legu ilm­kerti frá Night Space fást í Stef­áns­búð/p3.

Litríkur textíll

Litir eru vel til þess fallnir að lífga upp á til­ver­una. Fallegir púðar og teppi í upp­á­halds­lit­unum þínum geta sann­ar­lega bætt and­ann. Efn­isvalið skiptir hér öllu máli en nátt­úr­leg efni geta gefið rým­inu meiri dýpt og gert stemn­ing­una enn betri.

Textíll úr nátt­úru­legum efnum gefur rým­inu meiri dýpt.

Blóm og pottaplöntur

Ef ein­hvern tím­ann er rétti tím­inn til að kaupa blóm og potta­plöntur inn á heim­ilið þá er það núna. Að færa nátt­úr­una inn á heim­ilið gefur góða raun en fjölda margar rann­sóknir benda til þess að blóm og plöntur hafi róandi áhrif og bæti loft­gæði. Prófaðu líka að setja afskorin blóm í lít­inn vasa á nátt­borðið. Það er gott og hressandi að byrja dag­inn á að sjá fal­leg blóm og nota­legt að enda hann á þeim nótum líka. Já, blóm geta svo sann­ar­lega gert krafta­verk!

Blóm á nátt­borðið lífga svo sann­ar­lega upp á til­ver­una. Mynd/Hákon Davíð Björns­son

Röð og regla

Reyndu eftir fremsta megni að hafa heim­ilið í röð og reglu. Þegar aðrir álags­þættir vega þungt líkt og á tímum sem þessum skiptir gríð­ar­legu máli að skipu­lag heim­il­is­ins sé gott. Nýttu tím­ann til að grisja og gefðu frá þér hluti sem þú notar ekki lengur. Ofhlaðin rými geta skapað streitu og látið okkur líða eins og við höfum litla sem enga stjórn á hlut­unum. Taktu líka til í skápum og skúffum og komdu skipu­lag­inu í lag þar og umgengnin á heim­il­inu verður auð­veld­ari. Síðast en ekki síst: Komdu þér upp góðri rútínu. Það skiptir máli að byrja dag­inn vel. Litlir hlutir eins og að búa alltaf um rúmið á morgn­ana setur tón­inn fyrir dag­inn. Röð og regla gerir verk­efni dags­ins auð­veld­ari að fást við.

Að búa um rúmið er góður vani sem setur tón­inn fyrir dag­inn.

Loftaðu út

Ein helsta ástæða myglu­vanda er of lítil loftun. Líkleg skýr­ing er að margir eru fjarri heim­ilum sínum stóran hluta dags­ins við vinnu og í skóla og loka gluggum áður en farið er út af heim­il­inu. Nú þegar flestir eru heima er gott að nýta tæk­færið og venja sig á að lofta vel út en nauð­syn­legt er að hreyf­ing kom­ist á loftið til að hindra óæski­lega raka­söfnun. Í húsum þar sem er gólf­hiti er sér­lega mik­il­vægt að reglu­leg hreyf­ing sé á loft­inu en einnig er gott fyrir and­lega og lík­am­lega líðan að opna reglu­lega út og hleypa fersku lofti inn en staðið loft getur aukið slen.

Það er fátt eins mik­il­vægt og góð loftun á heim­il­inu.