Segir Heilbrigðisstofnun Austurlands hafa framfylgt heimsóknarbanninu af of mikilli hörku

Ármann Ingimagn Hall­dórs­son, véla­maður á Egils­stöðum, ætlar að leita réttar síns gagn­vart Heil­brigð­is­stofnun Aust­ur­lands (HSA) vegna heim­sókn­ar­banns á hjúkr­un­ar­heim­il­inu Dyngju. Hann segir frá þessu í sam­tali við Morg­un­blaðið í dag. 

Þar kemur fram að eig­in­kona Ármanns, Gróa Ingileif Krist­manns­dóttir, glímir við vöðva­rýrn­un­ar­sjúk­dóm og þarf mikla umönnun. Hún dvelur þess vegna á Dyngju á
Egils­stöðum sem er rekið af HSA.

Ármann fékk að gista hjá Gróu á næt­urnar fram að heim­sókna­bann­inu til að sinna henni. En eftir að heim­sókn­ar­bannið tók gildi mátti hann ekki hitta Gróu. Í sam­tali við Morg­un­blaðið segir hann að honum þykir HSA hafa fram­fylgt heim­sókn­ar­bann­inu af of mik­illi hörku.

Hann seg­ist hafa nán­ast alveg verið í sjálf­skip­aðri sótt­kví, annað en sumt strafs­fólk Dyngju að hans sögn, og bendir á að kona hans sé ekki eldri borg­ari, en Gróa er 62 ára.

Honum var til­kynnt um heim­sókn­ar­bannið rétt áður en það tók gildi og segir frá því að hann hafi ekki náð að hitta Gróu áður en bannið skall á. „Ég komst ekki einu sinni inn til að sækja lyfin mín,“ sagði Ármann í sam­tali við Morg­un­blaðið.

Hann kveðst nú hafa leitað til lög­fræði­stofu í Reykja­vík og hyggst leita réttar síns gagn­vart HSA.