Spjallþáttadrottningin Ellen DeGeneres hefur birt opið bréf til starfsfólks þáttarins þar sem hún segir að sér þyki leitt að einhverjir í hópi starfsfólksins hafi orðið fyrir niðurlægjandi framkomu yfirmanna og sætt mismunun. Það hafi alltaf verið ætlun hennar að það að vinna við þáttinn færði starfsfólki gleði og hamingju, en eitthvað hafi greinilega breyst í tímans rás og því verði að kippa í lag.
Ellen segir að hún þekki það sjálf að vera mismunað og hafa næstum misst allt vegna þess hver hún er og hafi því djúpa samúð með þeim sem fyrir því hafi orðið frá öðrum í starfsliði hennar. Hún lofar breytingum á vinnuaðstæðum starfsfólksins og segist persónulega muni leggja sig fram um að af þeim verði.
Bréfið, sem Hollywood Reporter birtir, kemur í kjölfar ásakana starfsfólks á hendur sumra yfirmanna í teymi þáttarins og innbyrðis rannsóknar sem leiddi í ljós að þær ásakanir voru á rökum reistar. Hvorki Ellen né stjórnendur Warner Media, framleiðanda þáttanna, hafa gefið neitt uppi um það hvort þeir yfirmenn sem klagaðir hafa verið verði reknir, en heimildarmenn Hollywood Reporter segja að nokkuð ljóst sé að einhverjir hausar muni fjúka.
Athugasemdir