Kolbrún berst við tárin fyrir framan dómara: „Þetta er bara viðbjóðslegt“

Kolbrún Bene­dikts­dóttir sak­sókn­ari þarf starfs síns vegna að horfa á barnaklám. Hún segir að flestir geri sér ekki grein fyrir hversu mik­ill hryll­ingur slíkt efni sé. Þetta ásamt öðru kemur fram í við­tali Sigmars Guð­munds­sonar við hana sem sýnt verður í kvöld.

„Það er verið að nauðga börnum fyrir framan mynda­vél­ina og það er eft­ir­spurn eftir þessu. Þess vegna er þetta gert,“ segir Kolbrún í þætt­inum Okkar á milli.

Hún segir nauð­syn­legt fyrir hana og aðra í kerf­inu að horfa á barnaklám svo hægt sé að ákvarða refs­ingu. „Við þurfum að skoða barn­a­níðs­efni til að vita hvað við erum með í hönd­unum. Refs­ingin fer ekki bara eftir magni heldur líka gróf­leika. Þetta er okkar að skoða og sjá hvers lags efni um er að ræða,“ segir hún.

Hún ítrekar að barnaklám sé ein­fald­lega það versta sem nokkur getur horft á. „Þetta er bara við­bjóðs­legt. Ég held að margir hafi mynd af því að þetta sé svona ljós­blátt Lolitu-klám þar sem sjá­ist í brjóst en þetta er alls ekki svona. Þetta eru við­bjóðs­leg brot sem verið er að fremja gegn mjög ungum börnum. Þarna er um að ræða raun­veru­leg börn sem verið er að mis­nota ein­hvers staðar úti í heimi,“ segir Kolbrún og bætir við að nauð­syn­legt sé að brynja sig gagn­vart þessu.

Þá er ónefnd skelf­ing þol­and­ans. „Bæði þegar fólk kemur sjálft eða for­eldrar ungra barna eða ung­linga, sem hafa orðið fyrir svona kyn­ferð­is­brotum, lýsa því hvernig börnin þeirra hafa orðið litlir væng­brotnir fuglar. Þetta hefur svo gríð­ar­leg áhrif á þol­anda og alla hans fjöl­skyldu. Ég hef þurft að berj­ast við tárin í skýrslu­töku fyrir dómi. En ef þetta hætti alveg að hafa áhrif á mann ætti maður að pakka saman.“