Ný reglugerð um aðgerðir og takmarkanir vegna COVID-19 hefur tekið gildi. Líkamsræktarstöðvar mega hafa opnar að uppfylltum afar ströngum skilyrðum. Sitt sýnist hverjum um opnunina og er tekist á um málið á samfélagsmiðlum. „Hvað með sundlaugarnar?“ spyrja margir. Samkvæmt tilmælum verður eingöngu opið í skipulagða tíma. Tækjasalir, búningsklefar og sturtur verða lokaðir.
Til að komast að í ræktinni þarf að bóka tímann fyrirfram og einungis mega 19 manns skrá sig í hvern tíma. Það munu því mun færri komast að á hverjum klukkutíma miðað við á venjulegum degi. Það má hins vegar leiða líkum að að þúsundir eigi líkamsræktarkort og því sennilegt að færri komist að en vilja. Þá hlýtur maður að velta fyrir sér hvernig gjaldheimtu af áskriftarkortum verður háttað en víða er innheimt mánaðarlega. Flestar líkamsræktarstöðvar hafa boðið viðskiptavinum sínum að frysta áskriftakortin á meðan stöðvarnar hafa verið lokaðar. Hvað gerist nú?
Neytendavakt man.is fór á stúfana.
„Ef ég á að vera alveg heiðarlegur við þig þá veit ég ekki enn hvernig við útfærum þetta. Þetta breytist allt svo hratt. En við munum setja inn tilkynningu á heimasíðuna um leið og ákvörðun hefur verið tekin,“ segir Þröstur Jón Sigurðsson, eigandi Sporthússins.
Þröstur segir mikla ásókn vera í skipulagða hópatíma í dag og hefur verið brugðist við eftirspurninni með því að bæta við fleiri tímum. Hann segist fagna því að fá smá líf aftur í stöðvarnar sínar í Kópavogi og Keflavík en þetta sé þó ekkert grín. „Þetta er alveg skelfilegt. Óvissan er svo mikil.“
Ekki náðist í eigendur World Class við vinnslu fréttarinnar.
Reebok Fitness og Hreyfing ætla ekki að opna að svo stöddu.
Ef marka má umræður á samfélagsmiðlum ætla að margir að halda sig fjarri líkamræktarstöðvum og rækta líkamann utandyra áfram af ótta við að næla sér í veiruna.
Neytendavakt man.is hvetur korthafa til að fylgjast með hvernig haldið verður á málum og heldur að sjálfsögðu áfram að fylgjast með.
Athugasemdir