Einar æstur og reiður: „Íslensk pólitík orðin endanlega að fávitahæli og apaplánetu“

„Ég veit ekki alveg með vini mína í Sjálf­stæð­is­flokknum… Ég hef fílað Brynjar Níelsson um margt og við stundum haft svip­aðan húmor, en þegar það er orðið að ein­hverjum brand­ara að fara eftir til­mælum rík­is­stjórnar sama flokks – þegar þetta er orðið að þeirra áliti að ein­hverju hahaha um að maður megi gera hvað sem er ef Helga Vala og Þór­hildur Sunna eru ekki að njósna um mann – þá hættir maður að hlæja. Ég meina – var þetta málið með allt það fólk sem hafði lifi­brauð sitt að stórum hluta af því að hitta annað fólk en hefur verið tekju­laust í 8-9 mán­uði?“

Þetta segir Einar Kárason, rit­höf­undur og vara­þing­maður Sam­fylk­ing­ar­innar á Facebook. Þar gagn­rýnir hann Brynjar Níelsson þing­mann Sjálf­stæð­is­flokks­ins harð­lega, sem í dag birti stuttan pistil á Facebook-síðu sinni. Þar lýsti Brynjar við­burða­ríkum degi og kvaðst hafa gætt sín sér­stak­lega að halda tveggja metra regl­una ef ske kynni að Sam­fylk­ing­ar­maður eða Pírati skyldi vera á gægjum á bak við runna. Brynjar sagði:

„Var mjög stress­aður og tauga­veikl­aður í búð­inni eftir því sem gestum fjölg­aði og fannst ég sjá Helgu Völu og Þórhildi Sunnu við hvern rekka. Á end­anum hljóp ég heim án þess að kaupa nokkuð.“

Einar Kárason er afar ósáttur við þessi skrif og segir: „Öll þau sem hafa tapað fram­færslu og fyr­ir­tækjum sínum; allt skóla­fólkið sem hefur þurft að lufs­ast heima í sínum her­bergjum í jafn langan tíma í stað þess að hitta kenn­ara og skóla­systk­ini – var það bara vegna þess að Helga Vala og Þór­hildur Sunna gætu kannski legið á gægjum?“

Bætir Einar við að hann telji að húmor Brynjars sé ætt­aður úr röðum „heima­aln­inga úr laga­deild HÍ, og sem hafa óvíða ratað og eru óspjall­aðir af því sem hugsað er af viti í ver­öld­inni, en hafa samt meira og minna stjórnað land­inu í heila öld.“

Þá segir Einar að lokum:

„Og nú þegar löggan hefur verið þvinguð til að biðj­ast afsök­unar á því að það hafi lekið út frá henni að for­maður umrædds flokks og kannski valda­mesti stjórn­mála­maður lands­ins hafi ákveðið að gefa skít í öll svona til­mæli, ja, þá er íslensk póli­tík orðin end­an­lega að fávita­hæli og apa­plánetu.“