„Sveinn Andri er ekki eingöngu þekktur fyrir að tæla til sín unglingsstúlkur heldur hefur hann tælt til sín ungar konur sem eru veikar fyrir vegna fíknivanda og borið í þær vímuefni. Þannig nýtir lögmaðurinn sér neyð þeirra og kemur fram vilja sínum. Um þetta hefur verið fjallað á opinberum vettvangi,“ skrifar Skúli Gunnar Sigfússon, sem oft er kenndur við Subway, í aðsendri grein á Vísi í dag. Skúli er harðorður í garð Sveins Andra Sveinssonar lögmanns sem hefur herjað á hann um endurgreiðslur vegna þrotabús EK 1923 ehf. Hæstiréttur hefir nú dæmt Skúla til að greiða hálfan milljarð króna til þrotabúsins sem Sveinn Andri stýrir.
Í grein Skúla í Vísi í dag segir að mikil spilling eigi sér stað innan Hæstaréttar. Hann fer ekki fögrum orðum um dómara málsins, Benedikt Bogason, né lögmanninn Svein Andra sem hann telur vera vini.
„Það mátti greina glott á íhyglislegu andliti Benedikts Bogasonar, forseta Hæstaréttar, þegar hann las upp dóm yfir mér í Hæstarétti í vetur leið, þar sem mér var gert að greiða um hálfan milljarð til þrotabús EK 1923 ehf,“ skrifar Skúli og heldur áfram.
„Með dóminum var Sveinn Andri Sveinsson, lögmaður sem sat þarna og hlustaði fjöðrum fenginn á vin sinn lesa dóminn, að fá upp í hendurnar hátt á annað hundrað milljónir í þóknun fyrir að sýsla með þrotabú millistórrar heildsölu.“
Skúli vill meina að sökum vinskapar Sveins Andra og Benedikts, hafi sá síðar nefndi verið vanhæfur til að dæma í málinu og undrast hann mjög niðurstöðu dómsins: „Þessa niðurstöðu höfðu ýmsir lögmenn, sem gjörþekktu málið, aldrei hugmyndaflug til að setja fram sem fjarlægan möguleika þegar ég hafði þráspurt þá í nokkra mánuði um allar hugsanlegar dómsniðurstöður Hæstaréttar.“
„Hæstiréttur kúventi þarna dómi Landsréttar, sem hafði á vormánuðum síðasta árs fellt vel ígrundaðan og rökstuddan dóm mér í vil,“ skrifar Skúli.
Skúli hafði áður gert þá kröfu að Benedikt Bogason viki sæti í málinu fyrir Hæstarétti. Og benti á vinskap þeirra Sveins Andra og Boga. „Sveinn Andri hafði stuttu áður birt á Facebook mynd af sjálfum sér með Benedikt Bogasyni í útskriftarveislu dætra Sveins Andra. Hann merkti vin sinn, hæstaréttardómarann, sérstaklega í færslunni með yfirskriftinni: „Sveinn A Sveinsson og Benni Boga eru saman.”
Síðasta sumar birtist frétt þess efnis og segir Skúli að Benedikt hafi lengi falast eftir embætti Hæstaréttardómara og því hafi hann tekið því afar illa þegar fréttin hafi birst um þá kröfu Skúla að Bogi viki í málinu.
„Benedikt Bogason hafði stefnt að því í áratugi að öðlast þetta æðsta embætti íslensks dómsvalds og mér er sagt að hann hafi bliknað og blánað af bræði þegar fréttin birtist. Hún birtist á laugardegi og tveimur dögum síðar stóð til að kjósa forseta Hæstaréttar. Eftir þetta átti ég mér tæplega viðreisnar von með málareksturinn fyrir Hæstarétti Íslands“.
Segist Skúli viss um að í kjölfar birtingu fréttarinnar hafi Benedikt ákveðið að dæma gegn Skúla.
„Ég er sannfærður um að á þessum tímapunkti hafi Benedikt Bogason ákveðið að „sekta“ mig í raun um hálfan milljarð fyrir að benda á náinn vinskap hans við mann sem hefur verið þekktur fyrir að tæla unglingsstúlkur til fylgilags við sig. Sú sekt er ekkert smáræði — um helmingur af nýju varðskipi svo að tekið sé dæmi.“
Skúli segir að Sveinn Andri hafi fellt unga móður, sem hafi í kjölfarið aldrei náð sér og að lokum tekið sitt eigið líf inni á Vogi.
„Þessi persónulegi vinur Benedikts Bogasonar, nú forseta Hæstaréttar, er gæddur þeirri ónáttúru að hann tældi unga nýmóður fyrir nokkrum árum þegar hún var nýkomin úr meðferð við fíknivanda. Móðirin hafði ætlað sér að standa sig fyrir ungt barn sitt en lögmaðurinn taldi hana á að þiggja frekar áfengi og kókaín heima hjá sér en að fara til barnsins síns.“
Segir hann þetta hafi komið fram í fjölmiðlum og sé alkunna.
Skúli segir Benedikt hafi óttast það að vera ekki kjörinn forseti Hæstaréttar vegna birtingu áðurnefndar fréttar um vinskap hans og Sveins Andra.
„Benedikt hefur hugsanlega talið að fréttin um náin tengsl hans við mann, sem sumir telja einn alræmdasta barnaperra lögmannsstéttarinnar fyrir utan Róbert Downey, gæti stofnað því í hættu að hann yrði kjörinn forseti Hæstaréttar. Það gæti skýrt bræðiskast hans og hefndarþorsta. Í kjölfar fjölmiðlaumfjöllunar sagði Benedikt sig frá málinu en ég er engu að síður sannfærður um að hann hefur beitt áhrifum sínum til að fá fram þessa fráleitu dómsniðurstöðu.“
Samkvæmt Skúla vita allir lögmenn að Sveinn Andri fær ávalt úthlutað bestu þrotabúunum og segir „dómaraklíkuna“ slá „þöggunarskjaldborg“ um Svein Andra og hans menn.
„Sveinn Andri Sveinsson, Símon Sigvaldason og Benedikt Bogason eru allir hluti af sömu klíku lögmanna og dómara sem fer með ógnarvöld og svífst einskis til að vernda sína og veita þeim brautargengi. Þetta er ný kynslóð elítu sem í eru eingöngu hægrisinnaðir miðaldra karlmenn sem flestir voru saman í lagadeild HÍ um og upp úr miðjum níunda áratugnum. Vinfengi æðstu manna íslensks dómskerfis við lögmann sem hefur orðið uppvís að stórkostlega ámælisverðum siðferðisbrotum gagnvart stúlkum nýkomnum af barnsaldri — sem í þokkabót hafa leitað ásjár hans sem lögmanns — vekur upp áleitnar spurningar um siðferðið sem þar þrífst.
Áður en ég fór í gegnum þessa martröð sem þetta dómsmál hefur verið hafði ég ekki trú á því að spilling þrifist í íslensku dómskerfi – hvað þá í Hæstarétti Íslands. Ég var sannfærður um að við værum svo miklu fremri flestum öðrum þjóðum og að spillingu í dómskerfi væri eingöngu að finna í vanþróuðum löndum og bananalýðveldum. Þessi reynsla sem ég hef gengið í gegnum hefur kennt mér að ég hafði rangt fyrir mér.“
Skúli segir niðurstöðu dómsins fráleita og afar alvarlegt ef fórnarlömb ofbeldis lendi í spillingu dómskerfisins.
„Með sölu eigna, þ.m.t. heimilis míns, get ég staðið undir því að borga fyrir fráleita niðurstöðu dómsins sem hér hefur verið rakin. Mér er engin vorkunn þar sem eingöngu er um peninga að ræða, þótt ég viðurkenni fúslega að þetta áfall hefur tekið verulega á mig andlega. Það er aftur á móti mun alvarlegra þegar fórnarlömb ofbeldis verða fyrir barðinu á spillingu í íslenska dómskerfinu og að því mun koma ef það hefur ekki þegar gerst.“
Athugasemdir