Samherji sakaður um svik við sjómenn – Brottreknir skipverjar og meðeigendur Samherjamanna æfir

Ásökunum á hendur stjórn­endum Samherja fyrir svik eða lög­brot linnir ekki. Hópur skip­verja á tog­ar­anum Heinaste boða nú að þeir mundi leita til dóm­stóla í Namibíu til að inn­heimta þá pen­inga sem gerð­ar­dómur hafði gert útgerð­ar­fé­lagi Samherja, ArticNam, að greiða þeim vegna upp­sagnar. ArticNam er í eigu Samherja og þriggja namibískra félaga. Íslenskir stjórn­endur félags­ins eru sagðir hafa sent frá yfir­lýs­ingu þar sem þeir segj­ast hafa frétt af því í fjöl­miðlum að gerð­ar­dómur hefði kom­ist að umræddri nið­ur­stöðu í máli skip­verj­anna.

RÚV segir frá þessu og vitnar í namibíska frétta­mið­il­inn New Era Live.  Skip­verj­unum var sagt upp  í des­em­ber 2018 og voru aðrir ráðnir tíma­bundið í þeirra störf.  Hinir brottreknu fengu hins vegar ekki greiddan upp­sagn­ar­frest og leit­uðu því til gerð­ar­dóms.

Gerð­ar­dóm­ur­inn komst að þeirri nið­ur­stöðu að ArticNam bæri að greiða skip­verj­unum 1,8 millj­ónir namibískra doll­ara fyrir lok júní. Skip­verjarnir hafa ekki fengið krónu og ætla því að láta reyna á nið­ur­stöðu gerð­ar­dóms­ins fyrir dóm­stólum.

Heinaste var  kyrr­settur vegna rann­sóknar yfir­valda í Namibíu á Sam­herj­a­skjöl­unum.  Þegar kyrr­setn­ing­unni var aflétt var tog­ar­inn seldur til félags­ins Tunacor Fis­heries.

Sam­herj­a­menn eru ekki ein­göngu sak­aðir um að svíkja sjó­menn sína. Með­eig­end­urnir að ArticNam eiga æi deilum við íslenska fyr­ir­tækið og úti­loka ekki mál­sókn á hendur Sam­herj­a­mönnum. Virgillo De Sousa, tals­maður þeirra namibísku félaga sem eiga 51 pró­sent eign­ar­hlut í ArcticNam, hefur sagt að þeir standi heils­hugar með sjó­mönn­unum.