Árni Gunnarsson, fyrrverandi þingmaður, skrifaði nýverið færslu á Facebook þar sem hann lýsti eftir bjargvætti sínum eftir að hann hafði dottið á höfuðið.
Árni hafði farið með konu sína í augnaðgerð og ætlað að sinna erindagjörðum á meðan konan var í aðgerð.
„Mikið langar mig að vita hvað hann heitir maðurinn, sem aðstoðaði mig skammt austan við Landspítalann í morgun, eða skammt frá þar sem sjúkrabílarnir athafna sig. Ég hafði farið með konu mína í augnaðgerð og þar sem áætlað var að ég gæti ekki sótt hana fyrr en eftir 4-5 klukkustundir ákvað ég að fara og sinna nokkrum erindum. Á leiðinni út á bílastæði hefur hálkublettur orðið á leið minni og ég fór lóðbeint á hausinn.“
Telur Árni að hann hefði misst meðvitund um stund. „Blóðið flæddi um höfuðið og ég gat ekki staðið upp; líklega misst meðvitund skamma stund. Þá kom hjálpsamur og vænn maður, hjálpaði mér á fætur og vildi allt fyrir mig gera.“
Segist Árni ekki hafa viljað fara á Landspítalann til að láta gera að sárum sínum, heldur frekar á Heilsugæsluna í Hamraborg í Kópavogi.
„Kannski undarleg ákvörðun, sem ugglaust var tekin vegna allrar umræðunnar um mikið álag á starfsrólki spítalans. Veit þó að ég hefði fengið góða þjónustu. – En yndislega starfsfólkið í Heilsugæslunni tók mér vel, saumaði nokkur spor í ennið og sendi mig svo í myndatöku. – Mér er sama hvað hver segir um heilbrigðiskerfið okkar. Í langflestum tilvikum er það gott og jafnvel frábært.“
Að lokum segir Árni að augnaðgerð konu sinnar hafi gengið mjög vel.
„En nú langar mig að vita hver hann er miskunnsami Samverjinn, svo ég megi þakka honum.“
Athugasemdir