Seyðfirðingar móðgaðir yfir aprílgabbi, eða hvað? „Þetta er besta, langbesta apríl gabb ever!

Seyð­firð­ingar brugð­ust sumir hverjir ókvæða við frétt sem birt­ist á heima­síðu Múla­þings í gær­morgun. Í frétt­inni stóð að til stæði að taka fyrstu skóflustung­una að nýjum íbúð­ar­kjarna fyrir eldri borg­ara á gamla íþrótta­vell­inum. Um apr­ílgabb var að ræða en spurn­ingin er, hver gabb­aði hvern?

Samkvæmt Aust­ur­frétt birt­ist frétt rétt fyrir klukkan tíu í gær­morgun, um að nú ætti að taka fyrstu skóflustung­una fyrir nýjum íbúð­ar­kjarna sem byggja á á gamla íþrótta­velli bæj­ar­ins. Seyð­firð­ingar voru hvattir til að mæta í bún­ingum við hæfi og helst með fána og freyði­vín. Þá var senni­leg­ast verið átt við hinn gula bún­ing Hugins Seyð­is­firði.

Ekki var fréttin búin að vera lengi inni þegar hún var merkt sem apr­ílgabb enda var 1. apríl einmitt í gær. Í hádeg­inu var fréttin svo fjar­lægð. Í yfir­lýs­ingu sem birt­ist á Facebook-síðu Múla­þings í gær biðst starfs­fólk skrif­stof­unnar á Seyð­is­firði afsök­unar á athæf­inu og kveðst vera leitt að hafa sært eða móðgað íbúa bæj­ar­ins með gríni sem sett var fram í góðri trú.

Samkvæmt heim­ildum Aust­ur­fréttar tóku að ber­ast athuga­semdir á skrif­stofu Múla­þings, skömmu eftir að fréttin fór í loftið. Íbúða­kjarn­inn sem vissu­lega mun rísa á gamla íþrótta­vell­inum er ætl­aður fyrir eldra fólk á Seyð­is­firði en hópur þess hefur nú þegar fest sér íbúðir í nýja kjarn­anum.

Ef athuga­semdir við afsök­un­ar­beiðn­inni á Facebook-síðu Múla­þings eru skoð­aðar er ekki að finna einn móðg­aðan Seyð­firð­ing enda ann­ál­aðir húmoristar. Einn þeirra segir að þau einu sem hafi látið gabb­ast hafi verið frétta­smið­irnir sjálfir: „Þetta er besta, lang­besta apríl gabb ever! Það er að segja að þykj­ast móðg­ast yfir gabb­inu. Og að biðj­ast afsök­unar á því. Kæru vin­konur. Þið hlupuð 1. Apríl. Þetta gabb var svo sak­laus að það er ekki mögu­leiki að móðg­ast yfir því. Nema sveit­ar­stjór­inn kannski, það er hann sem fær pillu.“

Í frétt Aust­ur­fréttar kemur fram að hús­næð­is­skortur sé tals­verður á Seyð­is­firði en skriðu­föllin í des­em­ber 2020 gerðu illt verra. Í kjöl­far þeirra þurfti að finna nýtt land undir íbúa­byggð og varð gamli íþrótta­völl­ur­inn fyrir val­inu. En þrátt fyrir að skipu­lagn­ing sé hafin og úthlutun íbúa hefur átt sér stað, hafa fram­kvæmdir látið standa á sér.