Skipstjóra Herjólfs loksins gert að hætta – Reiknar með að þetta gerist ekki aftur

Skip­stjóri Herjólfs sem snemma á árinu varð upp­vís að því að sigla án atvinnu­rétt­inda og falsa skýrslur um það hver hefði siglt bátnum hefur kom­ist að sam­komu­lagi við Herjólf ohf. um starfs­lok. Stað­festi fram­kvæmd­ar­stjóri Herjólfs, Hörður Orri Grett­is­son, þetta í sam­tali við mbl.is.

Mannlíf fjall­aði um málið ásamt fleiri miðlum fyrr á árinu en þá hafði skip­stjóri í Herjólfi verið lækk­aður í tign eftir að upp komst að hann hélt áfram að sigla skip­inu eftir að rétt­indi hans runnu út. Þá skráði hann aðra skip­stjóra fyrir sigl­ing­unum. Mannlíf upp­lýsti um að þessi tign sem hann var stríp­aður af hafi í raun verið búin til handa honum nokkru áður, en hann var gerður að yfir­skip­stjóra Herjólfs, tit­ill sem ekki var til áður og var hann lækk­aður niður í venju­legan skip­stjóra. Þá upp­lýsti Mannlíf einnig um til­tal sem skip­stjóri fékk í fyrra fyrir kyn­ferð­is­lega áreitni gagn­vart tveimur stúlkum í starfs­liði skips­ins. Samkvæmt heim­ildum Mannlífs var skip­stjór­inn afar óvin­sæll meðal skip­verja Herjólfs og mik­ill titr­ingur um borð.

Sjá einnig: Rétt­inda­laus skip­stjóri áminntur fyrir kyn­ferð­is­lega áreitni gagn­vart stúlkum í áhöfn Herjólfs

Samkvæmt mbl.is komst skip­stjór­inn og Herj­ólfur ohf. nú að sam­komu­lagi um starfs­lok sem til­kynnt voru starfs­mönnum í gær. Hörður vildi ekki tjá sig um ástæðu þess að til starfs­loka hafi komið nú en ekki um leið og upp komst um brot hans, en sagði að um væri að ræða mjög erfitt mál.

Býst Hörður ekki við að þetta muni end­ur­taka sig en félagið hefur nú skerpt á verk­lags­reglum sem voru þegar til staðar en hafi ekki reynst nægi­lega góðar.