Verkfræðistofan Stoð á Sauðárkróki hefur verið ráðin til að athuga hagkvæmni þess að lögð verði hitaveita í Norðurfirði í Árneshreppi. Skoðað verður að leggja veitu frá borholu í Krossnesi inn fjörðinn að Urðartindi. Vænst er skýrslu frá verkfræðistofunni síðar á þessu ári. Ef vel reynist gætu framkvæmdir hafist á næsta ári. Orkusjóður hefur veitt sex milljón króna styrk til verkefnissins. Bæjarins bestu greindi frá.
Að jafnaði hafa Vestfirðir verið álitnir kalt svæði, en með því er átt að ekki sé von á eldsumbrotum eða jarðskjálftum. Vestfirðir eru samt ekki „kaldir“ þegar kemur að jarðhita. Hann er þó mismikill eftir svæðum. Bæði á Reykjanesi við Djúp og á Reykhólum á sunnanverðum fjörðunum kemur upp nálægt 100°C heitt vatn.
Fram kemur á Vísindavefnum: „Jarðhitinn á Vestfjörðum hefur því löngum valdið fræðimönnum töluverðum heilabrotum. Jarðhiti á Íslandi hefur löngum verið tengdur við eldvirkni landsins og mesti hitinn finnst ávallt í kjörnum megineldstöðva á miðbiki landsins, en þau svæði eru flokkuð sem háhitasvæði. En hvernig stendur þá á því að svo mikinn jarðhita er að finna á landsvæði, sem þó hefur ekki upplifað nein eldsumbrot í margar milljónir ára? Svarið er alls ekki ljóst en ýmislegt bendir til þess að mögulega sé þörf á að endurskoða að einhverju leyti hugmyndir okkar um hina „köldu“ Vestfirði.“
Athugasemdir