Þingmaður Pírata, Eva Sjöfn Helgadóttir, gagnrýndi að sautján ára einstaklingur sitji nú í gæsluvarðhald í fangelsi í, en þetta kom fram í óundirbúnum fyrirspurnatíma á Alþingi.
Þetta kemur fram á mbl.is.
Það var í gær að greint var frá því að fimmtán einstaklingar sætu nú í gæsluvarðhaldi vegna árásar á skemmtistaðnum Bankastræti Club. Er sá yngsti einungis sautján ára gamall, en sá elsti í hópnum er á fertugsaldri.
Þingkonan Eva Sjöfn beindi spurningu sinni til Jóns Gunnarssonar dómsmálaráðherra; spurði til hvaða aðgerða Jón hafi gripið til að koma í veg fyrir að brotið sé á börnum.
Jón sagði mikið áhyggjuefni að raunveruleikinn á Íslandi væri vaxandi afbrot; sér í lagi á meðal ungra karlmanna:
„Við því verður að bregðast með margvíslegum hætti,“ sagði Jón og bætti við:
„Vegna rannsóknarhagsmuna þá getur þurft að einangra fólk í ákveðin tíma. Ég fullyrði það að bæði lögregla, löggæsla og fangelsismálayfirvöld beita sér fyrir því að það sé gert með eins mildum hætti eins og hægt er, og tillit tekið til ungs aldurs.“
Jón sagðist hafa átt samtal um málið við fangelsismálastjóra:
„Við sjáum mikil tækifæri í því að grípa til þeirra ráðstafana að bæði félagsþjónusta og sálfræðiþjónusta – einhver meðferðarúrræði og hjálp til þeirra sem vilja hana sérstaklega þiggja – verði í boði.“
Þingkonan Eva Sjöfn benti Jóni þá á að ekki væri að ræða um ungt fólk eða unga einstaklinga; heldur börn. Sagði hún einangrun vera afar íþyngjandi refsingu og sérstaklega hættulega börnum:
„Það er á ábyrgð hæstvirts ráðherra að tryggja heilsu barna í réttarvörslukerfinu. Hvað ætlar ráðherra að gera til þess að laga þessa óásættanlegu stöðu?“ spurði hún.
Jón sagði í kjölfarið að úrræðið væri ekki notað nema í undantekningartilfellum; þegar mikið liggur við; sé þá reynt að hafa einangrunina í eins skamman tíma og mögulegt er.
Athugasemdir