Maður á sextugsaldri hefur játað að hafa ráðist á barnsmóður sína með exi fyrir utan Dalskóla í Úlfarsárdal í lok nóvember. Maðurinn breytti afstöðu sinni í fyrirtöku málsins í Héraðsdómi Reykjavíkur í dag en neitaði þó að um hafi verið að ræða tilraun til manndráps. Maðurinn var ákærður fyrir stórfellt brot í nánu sambandi og tilraun til manndráps eftir að hann réðst á fyrrverandi sambýliskonu sína og barnsmóður.
Konan var stödd við skólann sem áður segir þar sem hún var að sækja börnin sín. Þá kemur fram í ákæru að maðurinn hafi slegið konunna með öxi í höfuðið og hent henni í jörðina. Konan náði að koma sér í burtu og leitaði skjóls í skólanum en börn, foreldrar og starfsfólk á svæðinu urðu vitni að árásinni. Konan fer fram á 4,5 milljónir króna í miska- og skaðabætur auk tveggja milljóna króna vegna munatjóns. Saksóknari fer fram á að manninum verði gerð refsing en hann hefur dvalið á réttar- og öryggisgeðdeild síðan að árásin átti sér stað á síðasta ári.
Athugasemdir