Hafnarfjarðarlögreglan var snar í snúningum þegar hún komst á snoðir um fíkniefnasala sem var á ferð ásamt samstarfsmanni sínum. Þegar lögreglan birtist reyndi ökumaður að komast undan á flótta á bifreið sinni. Þegar sú flóttaáætlun gekk ekki upp tóku meintir sölumenn til fótanna. Bæði ökumaður og farþegi voru handteknir eftir stutta eftirför á fæti þar sem lögreglumennirnir reyndust vera frárri á fæti. Flóttamennirnir eru grunaðir um að selja ólögleg fíkniefni. Talsvert af fíkniefnum fannst í fórum þeirra, ásamt peningum sem talinn er vera hagnaður af sölu. Þá kom á daginn að ökumaðurinn var eftirlýstur af lögreglunni.
Tilkynnt var um líkamsárás í verslunarkjarna. Gerendur sagðir vera tveir og þeir voru horfnir af vettvangi. Lögregla ræddi við þolanda
Lögreglu barst tilkynning um fótbrotna gæs í Skeifunni. Laganna verðir fóru strax á vettvang til að aðstoða fuglinn en þá var gæsin á bak og burt.
Maður var handtekinn á veitingastað í miðborginni grunaður um hafa rænt annan gest og beitt hann ofbeldi til þess að komast yfir fjármuni hans. Arásarmaðurinn var handtekinn og vistaður í fangaklefa þar sem hann bíður þess að vera yfirheyrður.
Rúðubrjótur var á ferð við verslun í miðborginni og lét til skarar skríða. Hann reyndi síðan að komast undan á flótta og settist upp í bifreið sem farþegi. Bifreiðin var stöðvuð skammt frá og aðilinn var handtekinn.
Athugull borgarin hringdi á lögreglu og tilkynnti um, að hann taldi vera ölvaðan ökumann. Lögreglumenn sáu bifreiðina í akstri stuttu seinna, en ökumaður stöðvaði ekki för sína þrátt fyrir ljós og hljóðmerki lögreglu. Ökumaðurinn ók að heimili sínu þar sem að hann var handtekinn. Hann reyndist vera útúrdrukkinn og var færður á lögreglustöð í sýnatöku.
Athugasemdir