Lögregla var kölluð út í gærkvöldi vegna manns sem var bæði æstur og í annarlegu ástandi í strætisvagni. Lögregla ræddi við vagnstjórann sem hafði engar kröfur og var manninum því ekið til síns heima eftir stuttar viðræður. Síðar um kvöldið handtók lögregla mann sem grunaður er um líkamsárás og eignarspjöll. Þegar flytja átti manninn niður á lögreglustöð hrækti hann í auga lögreglumanns og skallaði hann því næst í andlitið þegar var verið að spenna hann í öryggisbelti. Auk þess hótaði gerandinn að skaða lögreglumennina með hníf. Eftir átökin var maðurinn vistaður í fangaklefa þar sem hann bíður yfirheyrslu.
Í Hafnarfirði sat bifreið föst í grjóti og virtust tveir menn innan í bílnum ósjálfbjarga. Þegar lögregla kom á vettvang sá hún strax að mennirnir voru í annarlegu ástandi og voru því þeir handteknir og fluttir niður á lögreglustöð þar sem tekið var úr þeim sýni. Í Kópavogi kveiknaði í ruslatunnu aftan við fyrirtæki en var tunnan brunnin til kaldra kola þegar lögregla kom á svæðið. Þá sinnti lögregla öðrum minniháttar verkefnum auk umferðareftirlits.
Athugasemdir