Dabbi T borðar skyndibita eftir leiki: „Vil frekar borga aðeins meira fyrir minni tíma“

Davíð Tómas Tómasson, oft kall­aður Dabbi T, er neyt­andi vik­unnar. Davíð er alþjóð­legur körfu­bolta­dóm­ari sem dæmir í Subway-deild­unum en ásamt því vinnur hann hjá hug­bún­að­ar­fyr­ir­tæk­inu Moodup og heldur nám­skeið og fyr­ir­lestra sem hjálpa fólki að bæta and­lega og lík­am­lega heilsu. Davíð er 34 ára gam­all og býr í Laug­ar­dalnum ásamt kær­ustu sinni.

Gerir þú verðsamanburð á vörum og þjónustu?

Ég er ekki nægi­lega dug­legur að gera verð­sam­an­burð. Kærastan er mjög fylgin sér í því og spáir mikið hvar er hægt að gera bestu kjörin. Það mætti segja að hún væri „Spar­ar­inn“ og ég væri „Eyðarinn“.

Hvernig sparar þú í mat­ar­inn­kaupum? 

Ég reyni að gera flest mín mat­ar­inn­kaup í Bónus. Án þess að hafa gert mik­inn verð­sam­an­burð þá líður mér alltaf eins og ég sé næstum því að græða pen­inga ef ég versla í Bónus. Ég fer samt oft í þæg­indi fram yfir sparnað og enda oftar en ekki í rán­dýru hverf­is­búð­inni. Þegar ég geng út með tómt veskið þá segi ég alltaf við sjálfan mig að ég sé að styrkja inn­viði hverf­is­ins. Það lætur mér líða betur!

Endurnýtir þú? Ertu með ráð til annarra?

Ég end­ur­nýti nán­ast ekk­ert. Finnst það mjög sjar­mer­andi þegar ég heyri af fólki sem gerir það en ég er ekki enn kom­inn á vagn­inn.

Hvað hefur þú í huga þegar þú kaupir mat, fatnað og gjafir?

Ég reyni alltaf að „pri­orit­ise-a“ tím­ann minn fram yfir allt annað. Ég vil frekar borga aðeins meira fyrir minni tíma heldur en öfugt. Ég get þá notað tím­ann í hluti sem mér finnst vera betur varin í. Ég reyni því yfir­leitt að velja það sem er næst og fjót­leg­ast.

Hverju átt þú erf­ið­ast með að draga úr kaupum á? 

Ég á erf­ið­ast með að draga úr kaupum á skyndi­bita, sér­stak­lega á meðan körfu­bolta­tíma­bilið er í gangi. Það hentar ekki að borða kvöld­mat rétt fyrir leik og ég enda því yfir­leitt svangur, nýbú­inn að dæma, klukkan 21:30. Þá er rosa þægi­legt að grípa sér eitt­hvað fljót­legt á leið­inni heim.

Skiptir umhverfisvernd þig máli?

Ég er ekki mjög djúpur á umhverf­is­mál­unum. Hef bara í sann­leika sagt ekki kynnt mér það nægi­lega vel. Við flokkum heima og ég reyni að vera sam­visku­samur í því en að öðru leyti geri ég mjög lítið. 

Annað sem þú vilt taka fram? 

Nei