Jóna Óskarsdóttir sér og skynjar meira en margur og hún var að gefa út bókina Á álfaslóð þar sem hún segir frá kynnum sínum af álfum og álfheimunum á Borgarfirði eystra. Bókin inniheldur bæði frásögn um álfa sem og ljóð eftir Jónu, en bókin er bæði á íslensku og ensku.
Um er að ræða sanna frásögn skyggnrar konu af heimsókn sinni í álfabyggðir Borgarfjarðar eystra sem verður til að bjarga lífi lítils álfadrengs. Heillandi innsýn í huliðsheima Borgarfjarðar eystra sem færir okkur heim sanninn um að mannabyggðin þar nýtur verndar og vináttu hulinna afla og að enn ríkir gagnkvæm virðing þeirra á milli.
Á haustdegi 6. september árið 2012 var Jóna Ingibjörg Óskarsdóttir, húsmóðir frá Egilsstöðum, stödd á Borgarfirði eystra ásamt eiginmanni sínum Benedikt. Þar gengu henni til sjónar álfar og báðu hana um hjálp úr mannheimum. Þessi frásögn fjallar um sterka upplifun Jónu af kynnum hennar af álfheimum þennan haustdag.
Jóna er uppalin í Reykjavík af vestfirsku kjarnafólki komin en fluttist ung til Egilsstaða þar sem hún kynntist manni sínum, Benedikt Guðna Þórðarsyni. Hún er móðir sex barna og mestan hluta starfsævinnar hefur hún sinnt umönnun fatlaðra. Auk þess hefur hún starfað við verslunar- og veitingastörf á síðari hluta starfsævinnar utan við stórt heimilishald.
Uppistaðan í þessari bók er frásögn Jónu af kynnum hennar af álfheimum. Nákvæmar lýsingar hennar veita okkur innsýn í þennan heim sem Íslendingar hafa þekkt um aldir, og margar frásagnir í gegnum aldirnar segja einmitt frá samskiptum álfa og huldufólks við okkur mannfólkið. Það að Jóna getur svarað nákvæmum spurningum um staðhætti, útlit, klæðnað og ýmis óvænt smáatriði gerir sögu hennar raunverulega og ábyggilega. Einnig það að Gréta leiðsögukona biður um hjálp í Álfaborgina gefur frásögninni gildi. Frásögnin var skráð af Grétu og með undirskrift ferðamannanna, og var svo hljóðrituð hjá Tókatækni 8. september 2012, tveimur dögum eftir að sýnin birtist.
Jóna hefur í áratugi séð meira en aðrir og haft samskipti og tengsl við fólk hinum megin móðunnar miklu. Hún hefur seinni ár nýtt þessa meðfæddu skyggnigáfu til heilunar. Margir eru skyggnigáfu hennar til staðfestingar í gegnum tíðina, þ.á.m. börn hennar og eiginmaður sem staðfesta öll í samtölum að Jóna sé skyggn og hafi reglulega samskipti við framliðna. Jóna var barnung, aðeins fjögurra eða fimm ára, þegar hún hafði fyrst samband við manneskju að handan. Þá bað hún Gróu, ömmu sína, sem þá var látin um hjálp við finna teygjuband sem hafði týnst og hún vildi nota í teygjutvist. Gróa amma vísaði Jónu strax á teygjuna í kápuvasa, en bróðir hennar hafði líklegast verið að stríða henni og falið teygjuna þar. Æ síðan bað Jóna hana Gróu ömmu um hjálp við að finna hluti sem týndust. Að öðru leyti fannst Jónu lengi vel óþægilegt að sjá svona „vel“. Hún hélt skyggnigáfu sinni að mestu frá sér, þar til hin seinni ár þegar hún fékk hvatningu frá eiginmanni og einni dætra sinna um að skyggnigáfa hennar gæti hjálpað öðru fólki.
Hægt er að kaupa Á álfaslóð í verslun A4 á Egilsstöðum og í Húsi handanna, einnig á Egilsstöðum. Þá má hringja í Jónu í síma 869-7376 og kaupa af henni beint.
Grein þessi birtist í nýjasta tölublaði Mannlífs.
Athugasemdir