Þriggja barna móðir varð fyrir líkamsárás í miðbænum og leitar vitna: „Er bara andlega skelfd“

Poula Rós Mittel­stein varð fyrir fólsku­legri árás í miðbæ Reykja­víkur í gær og leitar nú að vitnum.

Poula Rós Mittel­stein, þrí­tug þriggja barna móðir, sem býr á Reyð­ar­firði, varð fyrir fólsku­legri lík­ams­árás í gær­kvöldi í miðbæ Reykja­víkur. Í árásinni missti hún fram­tönn og tvær aðrar losn­uðu. Poula Rós, sem er raf­virkja­nemi hjá Alcoa á Reyð­ar­firði, fór út að skemmta sér með vini sínum en þau fóru á milli Lebowski Bar og Pablo Discobar allt kvöldið. Hún varð á ein­hverjum tíma­punkti við­skila við vin sinn og fór ein á Pablo Discobar en þar varð hún fyrir hrotta­legri lík­ams­árás. Í nótt birti hún svo ljós­mynd af illa förnu and­liti sínu á Facebook og óskaði eftir vitnum. Fór hún svo á bráða­mót­tök­una til aðhlynn­ingar.

Poula Rós eftir árás­ina

Í sam­tali við Mannlíf seg­ist hún ekki muna mikið frá árásinni. Hún hafi haldið að árásin hafi átt sér stað á Lebowski Bar en vinur hennar hefði leið­rétt hana og sagt hana hafa gerst á Pablo Discobar. Poulu Rós minnir að árás­ar­að­il­inn hafi verið karl­maður en hún lagði fram kæru í gærnótt og bað lög­regl­una að rann­saka örygg­is­mynda­vélar.

Poula Rós dvelur nú heima hjá vini sínum áður en hún keyrir aftur heim á þriðju­dag­inn. Segist hún enn vera í nokkru áfalli. „Er bara svona and­lega skelfd, vont að muna ekk­ert og er illt í munn­inum. Það fór fram­tönn með rót og tvær losn­uðu,“ sagði Poula Rós en hún kemst ekki til tann­læknis fyrr en á morgun.

Poula Rós biður þá sem urðu vitni að árásinni eða vita eitt­hvað um hana að hafa sam­band við sig í síma 869-5094, og/eða hringja í lög­regl­una.

Fréttin upp­færð klukkan 21: 46.

Eftir að mynd­bands­upp­taka kom fram, kom í ljós að ekki hafi verið um lík­ams­árás að ræða heldur var raf­magns­hlaupa­hjóli ekið á Poulu Rós og hún skilin eftir í blóði sínu.