Hópárás innflytjenda í miðbæ Reykjavíkur reyndist vera lygi.
„Ég er fyrst og fremst eftir mig andlega og reiður út af þessu,“ sagði Birgir Rúnarsson í samtali við Morgunpóstinn árið 1994. Þá hélt hann því fram að 20 einstaklingar hefðu ráðist á sig og unnustu hans. Hann tók sérstaklega fram að um asískt fólk væri ræða. Átökin hafi byrjað þegar tælenskur maður hafi byrjað að abbast upp á sig.
„Hann var að snapa sér slagsmál eins og stundum gerist. Fyrst gerði ég ekki neitt en þegar hann byrjaði að kýla mig reyndi ég að verja mig, en ég vildi ekki standa í neinu veseni. Síðan kom félagi hans og argaði eitthvað á óskiljanlegu tungumáli. Hinn Tælendingurinn svaraði og þá tók félaginn á rás beint inn á Gullið en þetta gerðist þar beint fyrir utan. Og áður en ég vissi af kom halarunan af þessum Asíubúum hlaupandi út og rignir yfir mig og ég laminn og sparkað í mig. Ég reyndi að komast á fætur til að hjálpa kærustunni minni, sem þeir réðust líka á, en það gekk ekki. Loksins þegar ég var að komast á fætur, kom einn þeirra og sparkaði framan í mig með þeim afleiðingum að ég nefbrotnaði. Þegar ég stóð loksins upp sá ég bara hóp af Tælendingum sem öskruðu eitthvað sem ég skildi ekki. Þetta fólk ber ekki meiri virðingu fyrir landinu en það að það vill ekki læra tungumálið.“
Birgir sagði að bæði unnusta hans og hann sjálfur hafi slasast í slagsmálunum.
„Kærastan mín er tognuð bæði á baki og á hálsi, með gat á höfðinu og öll blá og marin á líkamanum. Sjálfur er ég með glóðarauga báðum megin og brákaður á tveimur liðum á annarri hendinni.“
Bróðir unnustu Birgis var skammt undan ásamt nokkrum vinum og kom þeim til aðstoðar og samkvæmt þeim voru árásarmennirnir vopnaðir.
„Vinur sem ætlaði að koma okkur til hjálpar sagði við mig að hann hefði séð hnúajárn, einn með hníf og svo var hann að tala um einhverja rörbúta. Ég get ekki staðfest þetta sjálfur þar sem ég sá þetta ekki og ég hef ekki ennþá náð í þennan mann til að fá staðfestingu,“ sagði Birgir.
Lögreglan ósammála
Lögreglan og vitni voru þó talsvert ósammála Birgi um málið. Karl Hjartarson, lögreglumaður, var á staðnum og sagði allt aðra sögu en Birgir.
„Ég bara gapti þegar ég sá að þetta var orðið stórmál. Í DV er talað um vopnaburð og mönnum hafi verið ógnað með hnífum, hnúajárnum og öðrum tólum. Það var ekki minnst einu orði á þetta við okkur um nóttina. Upphaflega kemur til okkar vegfarandi sem segir okkur að þarna sé krúnurakaður piltur í hermannajakka sem hafi verið með hníf. Við tókum hann inn í bíl og það kom í ljós að hann var með svona lítinn, rauðan hníf, svokallaðan Sviss Army knife, í vasanum en hvort hann hafi verið eitthvað að sveifla honum er ekki nokkur leið að henda reiður á. En þessi drengur var rammíslenskur og við höldum að hann hafi ekkert blandast í þessar stympingar. Ætli þetta hafi ekki allt í allt verið 15 til 20 manns, innfæddir og nýbúar, sem voru að stympast þarna. Við tókum tvo Tælendinga inn í bíl og einn sem var eitthvað að blanda sér í það mál fékk að fljóta með. Síðan var rætt við þetta par sem hafði verið í þessum pústrum og þá kom ekkert fram um neinn vopnaburð. Þessi frétt í DV á ekkert skylt við þetta mál sem átti sér stað aðfaranótt sunnudagsins.“
Í upphaflegri frétt DV sagði Birgir frá því að hann hafi verið laminn í lögreglubíl af tveimur tælenskum mönnum meðan það var verið að færa þá á lögreglunastöðina.
„Þessi klásúla að þeir hafi verið að slást inni í bíl er alveg af og frá. Það var lögreglumaður aftur í bíl hjá þeim og ræddi við þá í mesta bróðerni,” sagði Karl um það og sagði að lögreglan þyrfti mjög sjaldan þurft að hafa afskipti af innflytjendum.
„Það er sárasjaldan sem við höfum þurft að hafa afskipti af nýbúum í miðbænum. Við höfum ekki nokkurn skapaðan hlut við þetta fólk að athuga.“
Vitni töldu Birgir vera rasista
Haraldur Jónsson, veitingamaður á Gullinu, var vitni að slagsmálum en þau áttu sér stað fyrir utan Gullið. Hann sagði Birgir fara með rangt mál varðandi fjölda einstaklinga sem tóku þátt í slagsmálunum.
„Að þau hafi verið tuttugu er fjarri öllu lagi, ég giska á að hópurinn hafi verið öðru hvoru megin við tuginn,“ sagði Haraldur og tók fram að þessi hópur hefði sótt Gullið undanfarnar helgar og hann hefði ekkert nema gott að segja um hópinn.
„Þetta fólk hefur komið á staðinn um helgar undanfarna mánuði og ég hef ekki orðið var við nein vandræði af þeirra völdum. Einu óþægindin í kringum þessi grey eru að Íslendingarnir láta illa við þau. Við höfum margoft þurft að vísa mönnum á dyr vegna þess að þeir hafa verið að angra þau. Þeim er leyft að flytja til landsins en síðan fá þau engan frið.“
Haraldur vill meina að slagsmálin hafi byrjað út frá kynþáttafordómum og hann hafi ekki séð nein vopn notuð.
„Eins og þetta leit út frá okkur, án þess að ég geti fulllyrt neitt, byrjaði þetta í kringum eina tælensku stelpuna. Það er alltaf verið að kallað eitthvað á þessi grey og þarna byrjaði einhver hasar. Við sáum að það var verið að ýta við þessari stelpu og síðan braust þetta út.“
Birgir var spurður út í hvort Haraldur fari með rétt mál.
„Það er ekki rétt, það er einfalt mál. Ég hafði enga ástæðu til þess. Hann gekk á mig og byrjaði þetta og ég var bara að reyna að verja mig. Ég var á leiðinni heim. Ef ég hefði byrjað þetta væri ég ekki í málaferlum eða að flagga þessu á þennan hátt.“.
Þá vildi Birgir ekki láta taka myndir af sér eða áverkum til sönnunar.
„Ég vil ekki fá skrúfjárn eða hníf í bakið einhvern tímann þegar ég er að skemmta mér í framtíðinni.“.
Íslendingunum að kenna
Í vikunni á eftir var svo tekið viðtal við Grím Grímsson sem var vitni að málinu. Hann sagði Birgi hafa verið að ljúga.
„Það sem ég sá var að allstór hópur Íslendinga veittist að fáeinum einstaklingum af asískum uppruna sem máttu sín lítils og voru all hart leiknir. Sú atburðarás sem lýst er í DV af þessu atviki kemur vægast sagt illa heim og saman við það sem ég sá,“ sagði Grímur. „Ætli það hafi ekki verið fimm tælenskir strákar og þrjár eða fjórar tælenskar stelpur sem voru þarna saman og Íslendingarnir veittust að. Þetta var ekki neitt svakalegt, en einhverjir pústrar gengu þó þarna á milli. En eina blóðið sem ég sá var á andliti eins Tælendingsins.“
Grímur endaði á að segja að Birgir væri líklega rasisti.
Athugasemdir