Steinunn Árnadóttir tók ljósmyndir í gær af ástandi kindanna í Þverárhlíð í Borgarfirði og birti á Facebook.
Orgelleikarinn og dýraverndarsinninn Steinunn Árnadóttir heldur áfram að minna á skelfilegt ástand kinda frá bænum Höfða í Þverárhlíð en þær hafa margar hverjar verið afskiptalausar úti í kuldanum. Steinunn hefur með reglulegum hætti birt ljósmyndir af kindunum sem sumar hafa marglaga ull og lömb sem fæðast úti og fleira frá Þverárhlíð.
„Framhald úr Hryllingssögu minni: vorið 2024
Á ferð minni í dag, 7.apríl var nöturlegt að fara um Þverárhlíð.
Kindurnar í Hryllingssögunni eru farnar að bera (eiga lömbin) úti í kuldahelvítinu.“ Þannig byrjar nýjasta færsla Steinunnar. Því næst lýsir hún hinni nöturlegu sýn sem beið hennar:
„Þær eru úti í einni allsherjar hrúgu, óbornar, bornar, horaðar og sumar án ullar að hluta.Nokkrar eru sloppnar út og koma til með að bera án eftirlits, einhversstaðar út í vegkanti eða undir kletti.
Móðurlaust lamb jarmaði í kuldanum eftir hjálp. Ósennilegt að það lifi af nóttina!“
Að lokum skýtur hún á Matvælastofnun:
„Þetta er undir stöðugu, vökulu eftirliti Matvælastofnunarinnar.Ekkert hefur breyst til batnaðar, nema margra-ára-ullin hefur verið rifin af og nú skín í bert holdið!Þetta er óviðunandi !
Myndir sem fylgja eru teknar í dag 7.apríl“
Athugasemdir