Nemandi í Arizona State háskólanum hefur verið lögð inn á sjúkrahús eftir að hún var sögð hafa verið stungin „nokkrum sinnum“ af jafnaldra sínum þegar hún gekk inn í kennslustofu.
Samkvæmt Fox News handtók lögreglan í Maricopa-sýslu og ákærði Kaci Lenise-Charlie Sloan, 19 ára, grunaða um fyrstu gráðu morðtilraun, alvarlega líkamsárás með banvænu vopni, afskipti af menntastofnun og óeðlilega hegðun, fyrir að stinga bekkjarsystur sína, Mara Daffron, en árásin átti sér stað 19. september á háskólasvæði ASU í West Valley.
Eins og fram kemur í lýsingu fyrir GoFundMe fjáröflun, sem hefur verið sett upp af nágrönnum Daffron, var hún „stungin nokkrum sinnum, en sem betur fer hefur hún tekið miklum framförum og er á batavegi.“
„Við viljum að samfélagið okkar komi saman og styðji Daffron fjölskylduna á þessum erfiða tíma. Þessir fjármunir munu renna í allt sem fjölskyldan gæti þurft,“ héldu skilaboðin á GoFundMe áfram. „Við vitum að Mara mun koma sterkari út úr þessari ólýsanlegu árás en nokkru sinni fyrr. Við þökkum öllum sem geta lagt sitt af mörkum! Við munum deila fleiri uppfærslum eftir því sem við fáum þær frá fjölskyldu hennar.“
Tilviljunarkennd árás
Samkvæmt yfirlýsingu sem Fox News varð sér út um, sagði lögreglan að Sloan hafi stungið Daffron „án ögrunar og án nokkurra orða“.
Talið er að á annan tug vitna hafi séð árásina og deildu vitnisburði sínum um atburðinn með yfirvöldum.
Eins og fram kemur í skýrslum sagði lögreglan að eitt vitnanna hafi náð að „afvopna sakborninginn með því að draga hnífinn frá hægri hendi ákærða og kastað honum í burtu,“ á meðan annar nemandi „sparkaði hnífnum aftar í kennslustofuna.“
„Annað vitni lýsti því að gerandinn hafi setið í kennslustofunni við skrifborð sitt og hafi staðið skyndilega upp og hlaupið að fórnarlambinu þegar það kom inn í skólastofuna og stungið hana margoft,“ skrifuðu yfirvöld í yfirlýsingunni.
Lögreglan hefur einnig uppgötvað miða í bakpoka Sloan, þar sem hún er sögð hafa skrifað um það sem hún var „að fara að fremja“. Hins vegar er sagt að á handskrifaða minnismiðanum væri „ekki sérstaklega tilgreint hvað hún var að vísa til“.
Játaði strax
Samkvæmt skýrslunni játaði Sloan fyrir rannsóknarlögreglumönnum að hafa skipulagt árásina kvöldið áður.
„Gerandinn viðurkenndi að hún kom í kennslustundina til að meiða einhvern og hafði skipulagt árásina kvöldið áður,“ sagði í yfirlýsingunni, samkvæmt KPNX. „Þessi skipulagning fól í sér að setja hnífinn sem notaður var við árásina í bakpoka hennar til að koma með í skólann. Sakborningurinn sagði rannsóknarlögreglumönnum að hún vissi fornafn fórnarlambsins en vissi ekkert annað um hana. Hún þekkti fórnarlambið úr fyrri kennslutímum og deildi kennslutíma með henni á þessari önn.“
Lögreglan sagði einnig að Sloan hafi sagt þeim að hún hafi valið að ráðast á Daffron vegna þess að hún „taldi að fórnarlambið væri auðveldara skotmark“ en hinn aðilinn sem hún var að sögn að íhuga að ráðast á.
Hetjan tjáir sig
Nemandinn sem sagður var hafa afvopnað Sloan, rifjaði atvikið upp í viðtali við Fox 10 Phoenix.
Matthew McCormick sagðist hafa verið að búa sig undir kennslutímann þegar hann heyrði Daffron öskra vegna þess að hún var stungin.
„Á því augnabliki fór eiginlega engin hugsun í gegnum hausinn á mér, ég vissi bara að ég fann mig knúinn til að gera eitthvað,“ sagði McCormick.
Samkvæmt upplýsingum frá lögreglunni hafði Sloan þegar stungið Daffron tvisvar áður en McCormick fékk tækifæri til að stíga inn í.
„Þegar hún var að fara að stinga í þriðja skiptið gat ég gripið um úlnlið hennar og haldið henni áður hún gat ollið meiri skaða,“ rifjar hann upp.
Samkvæmt Fox 10 Phoenix var Daffron flutt á Banner Thunderbird sjúkrahúsið þar sem hún gekkst undir aðgerð vegna sára á þríhöfða hennar og rifbein þar sem hnífurinn hafði skorið í milta hennar. Sloan er sögð enn á bakvið lás og slá.
Í yfirlýsingu sagði ASU við Fox News:
„Kaci Sloan var strax handtekin, grunuð um fyrstu gráðu morðtilraun, alvarlega líkamsárás með banvænu vopni, afskipti af menntastofnun og óeðlilega hegðun,“ sagði fulltrúi háskólans í samtali við Fox News. „Henni er haldið á 250.000 dala tryggingu.“
„ASU og allt ASU West Valley samfélagið er mjög sorgmætt yfir því sem gerðist. ASU West Valley er náið háskólasvæði nemenda, kennara og starfsfólks. Ráðgjafarstuðningur stendur öllum til boða,“ segir að lokum í yfirlýsingunni.
Athugasemdir