Tilkynnt var um innbrot í verslun til lögreglunnar sem sinnir Austurbænum, Miðbænum, Vesturbænum og Seltjarnarnesi. Á upptökum sést aðili taka vörur úr versluninni og koma sér í burtu. Lögreglan rannsakar málið.
Einstaklingur var handtekinn grunaður um sölu fíkniefna en hann var einnig með fulla vasa af seðlum. Er hann vistaður í fangaklefa á meðan málið er rannsakað.
Tilkynnt var um slagsmál sem áttu að hafa brotist út við Austurvöll en þar var einn aðili sagður hafa hótað öðrum með hnífi. Lögreglan handtók þrjá og flutti á lögreglustöð í yfirheyrslu. Kom þá í ljós að enginn hnífur hafi fundist og að í raun hafi engin átök átt sér stað. Var þeim því sleppt eftir að búið var að ræða við þá.
Lögreglunni sem starfar í Hafnarfirði, Garðabæ og á Álftanesi barst tilkynning um slys á rallýkrossmóti. Einhver eymsli urðu en ekki er talað um alvarleg meiðsli.
Ökufantur brást ókvæða við afskiptum lögreglu þegar hann var stöðvaður fyrir of hraðan akstur. Endaði það með því að hann var handtekinn og fluttur á lögreglustöð. Málið var síðan afgreitt á stöðinni og var ökumaðurinn laus af því loknu.
Lögreglunni sem annast Kópavog og Breiðholt barst tilkynning um einstakling sem gekk á milli bíla og reyndi að komast inn í þá. Kom styggð á kauða er hann sá tilkynnanda hringja á lögreglu. Náði hann að koma sér undan er lögreglan mætti á vettvang.
Tilkynning barst lögreglunni sem sér um Grafarvog, Mosfellsbæ og Árbæ, vegna yfirstandandi innbrots í verslun. Voru þjófarnir farnir af vettvangi er lögreglu bar að garði. Voru þeir hins vegar handtekinir stuttu síðar og vistaðir í fangaklefa í þágu rannsóknarinnar.
Athugasemdir