Smituð Mánagarðsbörn hugsanlega á fjórða tug: „Maður er í losti“

Ellefu börn til við­bótar hafa sýnt ein­kenni þess að hafa sýkst af E.coli á leik­skól­anum Mána­garði í síð­ustu viku en blóðprufur úr þeim verða greindar í dag. Fram að því höfðu alls 27 börn verið greind með sýk­ingu. Í heild­ina hafa þá 38 börn sýnt ein­kenni en RÚV greindi fyrst frá mál­inu.

Tvö börn eru ennþá á gjör­gæslu og alvar­lega veik. Börnin urðu veik eftir að hafa borðað sýktan mat á leik­skól­anum í síð­ustu viku og er verið að rann­saka öll mat­væli á staðnum en talið er nauta­hakk gæti verið söku­dólg­ur­inn. Nauta­hakkið var í mat sem boðið var upp á fimmtu­dag­inn í síð­ustu viku. Búist er við að lokið verði að rann­saka mat­vælin um helg­ina.

Hugur allra hjá börnunum

„Maður er í losti, maður er í adrena­lín­rússi. Bara að reyna að finna út úr þessu, finna hvað gerð­ist. Vinna með sótt­varn­ar­yf­ir­völdum, heil­brigð­is­eft­ir­liti, senda réttar upp­lýs­ingar til for­eldra. Þetta er bara risa, risa, risa, risa­stórt verk­efni,“ sagði Soffía Emelía Braga­dóttir, leik­skóla­stjóri Mána­garðs, í við­tali við Vísi um ástandið.

„Við erum með alveg stór­kost­legan for­eldra­hóp. For­eldr­arnir hafa tekið þessu ótrú­lega vel og sýnt þessu skiln­ing. En að sjálf­sögðu er fólk í áfalli, það gefur auga leið. Bæði starfs­fólk og for­eldrar. Og auð­vitað er hugur allra hjá börn­unum sem eru mest veik uppi á barna­spít­ala.“