Fjórar íslenskar konur sviknar af frystihúsi í Noregi: „Það er ekki einu sinni rúm til staðar“

Fjórar íslenskar töldu sig illa sviknar af norsku fyr­ir­tæki árið 1995.

Forsaga máls­ins er sú að frysti­húsið Mathisen fiskeindustri aug­lýsti eftir starfs­fólki til að starfa við fisk­vinnslu í Kilberg í Norður-Noregi, stutt frá landa­mærum Rúss­lands, og var það gert í gegnum íslenska fyr­ir­tækið Ingvarco.

„Þeir sögðu okkur öllum það sama: Að við fengjum greitt farið út og frítt hús­næði. Nú er komið í ljós að þetta eru hrein og klár svik og fyr­ir­tækið neitar að borga fyrir okkur farið hingað og ég þarf að greiða sem nemur 20 þús­undum íslenskra króna í leigu á mán­uði,“ sagði Rósa Svav­ars­dóttir við DV um málið en hún seldi íbúð sína og búslóð á Íslandi áður en hún flutti til Noregs. Rósa sagði að launin sem hafi verið greidd hafi verið langt undir því sem lofað var.

Ískaldar að bíða við síma

„Við erum búnar að berj­ast í því að fá þetta lag­fært en ekk­ert gengur. Við höfum ítrekað haft sam­band við fyr­ir­tækið í Reykja­vík og þeir lofa alltaf að bjarga mál­unum en ekk­ert ger­ist,“ sagði Rósa. „Nú síð­ast lof­uðu þeir að hafa sam­band við okkur í almenn­ings­síma á til­settum tíma. Við biðum eftir sím­tal­inu, ískaldar, við sím­klef­ann en þeir hringdu ekki. Loksins gáf­umst við upp að bíða og ég hringdi í þá. Sá sem varð fyrir svörum þótt­ist þá ekk­ert vita hvað tím­anum liði og spurði hvort við gætum verið við síma­klef­ann eftir klukku­tíma og þá átti allt að vera komið á hreint. Ég sam­þykkti það en það var sama sagan og þeir hringdu ekki. Þegar ég hringdi aftur þá kom bara sím­svari. Þeir eru greini­lega hættir að vilja tala við okkur.“

Þá hafi þá hafi ástandið íbúð­inni sem Rósa fékk verið mjög slæmt og ekk­ert verið hægt að hvíl­ast.

„Það er ekki einu sinni rúm til staðar þarna. Við höfum ein­hvern bedda sem klambrað hefur verið saman á staðnum og er með 5 sentí­metra þykka dýnu. Maður er alltaf að vakna upp á nótt­unni þegar maður þarf að snúa sér við af kvölum. Við vinnum 11 tíma á sól­ar­hring og auð­vitað vantar mikið upp á að það sé ein­hver hvíld í þessu. Mér sýn­ist sökin öll liggja hjá fyr­ir­tæk­inu á Íslandi og fram­kvæmda­stjór­inn hérna segir okkur að hún hafi aldrei lofað að greiða far­gjaldið eða útvega frítt hús­næði. Mér skilst að þeir hafi fengið greiddar 50 þús­und krónur fyrir hvern starfs­mann sem þeir útveg­uðu.“

Benda á hvort annað

Þor­leifur Ólafsson hjá Ingvarco sagði í sam­tali við DV að fyr­ir­tækið væri að vinna að því að koma öllu í lag. „Því var lofað af fyr­ir­tæk­inu úti að farið yrði greitt en þetta er allt að sjatl­ast núna. Við erum nýbúnir að tala við fram­kvæmda­stjór­ann og hún ætlar að bæta úr því hvað varðar hús­næðið og far­gjaldið. Ég bíð nú eftir að fá fax að utan með stað­fest­ingu þess að þetta verði lagað,“ sagði Þor­leifur „Það voru 180 umsækj­endur og það er frá­leitt að ætla að við höfum þurft að lofa ein­hverju til að trekkja að. Fyr­ir­tækið hafði sam­band við okkur og bað okkur að ráða fólk þarna út. Við áttum að fá greitt fyrir það en höfum enn ekki fengið þá pen­inga. Hún hefur ekki staðið við sitt og við erum að gera okkar besta til að leysa þetta.“

Gerd Solveig Mathisen, fram­kvæmda­stjóri frysti­húss­ins Mathisen fiskeindustri, hafn­aði öllum ásök­unum kvenn­anna. „Ég get ekki borið ábyrgð á því sem umboðs­að­il­inn kann að hafa mis­skilið í mínum skila­boðum. Ég veit sjálf hvað ég hef skrifað og ég hef staðið við það allt.“