Hreyfingin No Borders Iceland hafa ákveðið að færa mótmæli sín sem fara átti fram á morgun klukkan 13:00, frá Austurvelli og yfir á Ingólfstorg. Ástæðan er ótti við ofbeldi rasista.
Mannlíf sagði frá fyrirhuguðum mótmælum No Borders Iceland gegn öðrum mótmælum sem fara fram á morgun á Austurvelli en þar kemur saman fólk sem vill mótmæla stefnu yfirvalda í útlendingamálum hér á landi. No Borders Iceland hreyfingin ætlaði sér að halda sín mótmæli klukkan 13:00 á Austurvelli en hin mótmælin fara fram á sama stað klukkan 14:00.
Í yfirlýsingu sem No Borders Iceland sendi frá sér segir að skjáskot hafi borist hreyfingunni úr hópnum „Ísland, þvert á flokka“, sem sýnir athugasemdir og samtöl einstaklinga þar sem hvatt er til ofbeldis gegn stuðningsmönnum Palestínu og gengur einn svo langt að spyrja hvort hann þurfi að fara að endurnýja byssuleyfið.
„No Borders getur ekki litið framhjá þeirri samfélagsógn sem stafað getur af slíkum einstaklingum og hatursorðræðu þeirra. Af þeim sökum höfum við ákveðið að færa „Mótmæli gegn rasisma“ af Austurvelli og yfir á Ingólfstorg.“
Á mótmælum hreyfingarinnar eru fyrirhugaðir tónleikar, sem nú færast sem sagt yfir á Ingólfstorg.
Að lokum segist hreyfingin vilja vekja athygli á síaukinni hættu sem stafar af hatursorðræðu og hvetja alla til að mæta á Ingólfstorg.
„No Borders vill vekja athygli á þeirri sívaxandi hættu sem felst í þessari hatursorðræðu. Við hvetjum alla til að mæta á Ingólfstorg klukkan 13:00 á laugardaginn, sýna samstöðu og senda skýr skilaboð: slík hegðun getur ekki liðist í okkar samfélagi.
Sameinumst gegn rasisma, hatri og aðskilnaði – og fyrir samfélagi byggðu á samstöðu, mannréttindum og virðingu.“
Mannlíf heyrði í Kristjáni Helga Þráinssyni hjá aðgerðadeild lögreglunnar á höfuðborgarsvæðinu og spurði hann út í mótmælin og hvort lögreglan hefði áhyggjur.
„Nei, þetta eru hópar sem eru báðir að mótmæla ofbeldi, ég trúi ekki að þeir séu að fara beita ofbeldi. En við erum meðvitaðir um þetta.“
Aðspurður hvort lögreglan yrði með viðbúnað á vettvangi mótmælanna svaraði Kristján. „Já, en ekki mikinn.“
Hér fyrir neðan má sjá yfirlýsingu No Borders Iceland í heild sinni:
Mótmæli
Boðað til skyndimótmæla við utanríkisráðuneytið vegna árása á Íran
Leikstjóri verðlaunakvikmyndar neitaði að taka við friðarverðlaunum
Fréttamaðurinn Don Lemon handtekinn vegna mótmæla gegn ICE
Rithöfundar og fræðimenn þrýsta á bresk yfirvöld vegna hungurverkfallsfanga
Ungur mótmælandi í Íran verður tekinn af lífi
Athugasemdir