Sá einstaklingur sem vakti sennilega mesta athygli á hælisleitendamótmælunum sem haldin voru í gær á Austurvelli er raftónlistarmaðurinn Brynjar Barkarson.
Brynjar, sem hefur í tæpan áratug verið hluti af hinni vinsælu hljómsveit ClubDub, hélt ræðu á Austurvelli þar sem hann talaði gegn hælisleitendum og stefnu íslenskra stjórnvalda á undanförnum árum í þeim málum. Það hefur vakið mikla athygli sumra í ljósi þess að Brynjar er tengdasonur Bjarna Benediktssonar, fyrrverandi forsætisráðherra, en fáir hafa haft jafn mikið um íslensk lög og stefnu að segja undanfarin áratug og Bjarni. Brynjar er í sambandi með Helgu Þóru, dóttur Bjarna, en þau hafa verið par síðan snemma á síðasta ári.
Ræða Brynjars hefur fallið í grýttan jarðveg hjá sumum og hefur íslenskukunnátta hans verið sögð léleg og þyki það kaldhæðnislegt í ljósi þess málstaðar sem hann tali fyrir. Fjölmiðlamaðurinn Egill Helgason benti á að Brynjar hafi verið klæddur í treyju frá knattspyrnuklúbbnum Manchester United.
„Það er sérlega fyndið að flytja ræðu gegn glóbalisma í Manchester United treyju. Eiginlega ekkert í heiminum er jafn glóbalíserað og einmitt enski fótboltinn,“ skrifaði Egill og birti mynd af Brynjari.
Þá birti rapparinn Emmsjé Gauti einnig mynd af Brynjari á Instagram þar sem hann gaf í skyn að Brynjar myndi ekki fá mörg verkefni sem tónlistarmaður eftir ræðuna en hann hefur á undanförnum vikum talað gegn hælisleitendum og þá sérstaklega múslimum á samfélagsmiðlum. Hvatti hann fólk til að gera hvað sem er til að „losna við þetta lið“.
Einnig sagði hann að „vandamálið er fólk úr þriðja heiminum og það aðhyllist islam. Þetta eru blóðsugur sem bera enga virðingu fyrir okkur, okkar siðum og menningu. Komin til að sjúga kerfið þurrt, nauðga og rífa kjaft.“
Athugasemdir