Eins og fjallað hefur verið um í fjölmiðlum í dag og í gær hefur Sýn ákveðið að leggja niður nafn Stöðvar 2 og mun stöðin nú heita Sýn.
Orðrómar hafa verið í gangi undanfarna mánuði að slíkt yrði gert og var starfsfólki Sýnar tilkynnt þessi ákvörðun á fundi sem haldinn var í gær í Egilshöll. Einhverjir starfsmenn og landsmenn hryggja þessa ákvörðun en vörumerki Stöðvar 2 hefur verið notað síðan árið 1986, þegar sjónvarpsstöðin var upphaflega stofnuð.
Ótrúleg tilviljun réði því hins vegar að Oddur Ævar Gunnarsson, fréttamaður Stöðvar 2, fékk sér húðflúr af merki Stöðvar 2 í síðustu viku þegar hann var að fjalla um íslenska húðflúrhátíð. Nú er merkið ekki lengur í notkun.
Mannlíf ræddi við Odd um nýja húðflúrið eftir að tilkynnt var um ákvörðun Sýnar að leggja Stöð 2 niður.
„Ég var búinn að lesa eitthvað aðeins á samfélagsmiðlum. Maður var búinn að heyra einhverja orðróma en ekkert staðfest þannig að maður vissi svo sem ekki neitt,“ sagði Oddur þegar hann var spurður hvort hann hafi grunað að Stöðvar 2 nafn myndi hverfa.
„Ég er bara ánægður með þetta. Þetta er geggjað vörumerki, gott að hafa þetta á líkamanum.“
Hann segist hafa mikinn húmor fyrir þessu og er spenntur fyrir framtíðinni svona í ljósi þess að þetta sé aðeins nafnabreyting
„Það má eiginlega segja að þetta húðflúr sé töluvert nettara núna. Stöð 2 hefur svo fáránlega mikla sögu, þannig að það er gaman af þessu.“
Athugasemdir