Reynslusaga Oddnýjar Bjargar Rafnsdóttur birtist fyrir nokkrum dögum á vefsíðunni Mæður gegn morðum. Oddný er í hópi þeirra hversdagslegra kvenna og kvára sem hafa lagt sitt að mörkum í að hjálpa fjölskyldum á Gaza. Hún er leikskólakennari og býr á Hrauni í Aðaldal í Þingeyjarsveit en er í samskiptum við um 30 fjölskyldur á Gaza.
Oddný sneri aftur á samfélagsmiðla til þess að taka þátt í grasrótarstarfi og berjast fyrir Palestínu. Í miðjum sauðburði var hún að senda tölvupósta á sveitarfélög og vekja athygli á sniðgöngu fyrirtækja, svo sem Rapyd á samfélagsmiðlum. Í kjölfar þess hafði Doha, móðir fjölfatlaðs barns sem býr á Gaza, samband við Oddnýju í leit að aðstoð. „Ég hélt fyrst að þetta væri skam þar sem saga hennar var svo hrikaleg.“ Dohu var synjað af Ísraelsmönnum að yfirgefa Gaza til þess að leita að heilbrigðisþjónustu fyrir barnið sitt. Hún þurfti því að horfa á barnið sitt deyja í höndunum sínum. Doha á fleiri börn, eitt 10 ára, annað 9 ára og eitt nýfætt sem er enn á brjósti. Þau glíma nú við mikla hungursneyð ofan á stríðsátökin.
Í samstarfi við Kristínu S. Bjarnadóttur fór Oddný að safna peningi fyrir fjölda fjölskyldna á Gaza. Þær hafa nú stofnað Vonarbrú, almannaheillafélag með starfsemi yfir landamæri. Markmið félagsins er að styrkja þær rúmlegu 60 fjölskyldur sem þær Oddný og Kristín hafa verið að styrkja óformlega. Vonarbrú tekur ávallt við frjálsum framlögum og unnið er að því að skrá félagið til leiks í Reykjavíkurmaraþonið svo hægt sé að hlaupa til styrktar þeirra.
„Ég veit hvað allt kostar á Gaza,” segir Oddný í pistli sínum en hún er í beinu sambandi við margar fjölskyldur á svæðinu. „Fyrir tveimur vikum kostaði kíló af kindakjöti 27 þúsund krónur en kind á fæti 5000 dollara. Ég veit hvað leigan undir tjöldin kostar en hún hækkar stöðugt. Ein af okkar skjólstæðingum yfirgaf tjaldbúðir þegar leigan hækkaði skyndilega.“
Oddný lýsir margs konar lífshættulegum aðstæðum sem fólkið á Gaza þarf að glíma við. Hún segir tengslin við fólkið verða sterkari eftir að sitja með þeim í sprengiregni heilu næturnar.
Á meðan að gríðarlegar hörmungar ganga yfir út í heimi er eðlilegt að finna fyrir vanmætti en Oddný er ein þeirra hversdagslegra kvenna sem hafa látið hendur standa fram úr ermum.
Hægt er að lesa pistil Oddnýjar í heild sinni á vefsíðu Mæður gegn morðum.
Athugasemdir