Tekjur kvenna dragast saman um rúm 30% árið sem þær eignast fyrsta barn og um 50% árið eftir. Þessi tekjumissir er langvarandi en tíu árum eftir fyrstu barnseign eru konur enn með 34,5% lægri rauntekjur en karlar. Þetta kemur fram í rannsókn Unu Margrétar Lyngdal Reynisdóttur sem var unnin í samstarfi við fjármála- og efnahagsráðuneytið. Hún byrjaði sem sumarstarfsmaður hjá ráðuneytinu en bauðst í framhaldi þess að vinna rannsókn fyrir B.S. ritgerð með ráðuneytinu.
Rannsóknin kannaði hvernig barneignir hefðu áhrif á rauntekjur karla og kvenna á Íslandi á tímabilinu 2003 til 2023. Í ljós kom að tekjur karla lækka ekki eða standa í stað eftir fyrstu barneign en tekjumissir kvenna er mikill í samanburði.
Mæður yngri en 28 ára verða fyrir meiri tekjumissi en eldri mæður. Tekjur kvenna sem eignast fyrsta barn 28 ára eða yngri eru 38,8% lægri en tekjur feðra á sama aldri.
Jákvæð þróun er þó á milli ára. Fyrir barneignir á árunum 2005 til 2009 var tekjumissir kvenna 75,7% en milli 2015 og 2019 var tekjumissirinn aðeins 25,9%.
Þetta er fyrsta rannsóknin um tekjumissi við barneignir á Íslandi en svipaðar rannsóknir hafa verið gerðar víða um heim. Tekjumissir íslenskra kvenna virðist vera meiri en í mörgum öðrum löndum svo sem Svíþjóð, Danmörku og Bandaríkjunum.
Í myndbandi sem fjármála- og efnahagsráðuneytið birti á samfélagsmiðlum segir Una Margrét að aðgangur að dagvistun sé lykilatriði til að draga úr tekjutapi mæðra.
Athugasemdir