Myndband sem sýnir níu ára stelpu í Reynisfjöru síðustu helgi fer eins og eldur í sinu um samfélagsmiðla en stelpan lést eftir að hafa lent í sjónum. Annað myndband sem sýnir eldri systur hennar hrópa á hjálp hefur vakið heimsathygli en tæplega 900 þúsund sinnum hefur verið horft á það myndband.
Ekki eru allir sáttir með myndböndin og telja birtingu á þeim ósmekklega en umræður um birtinguna hafa skapast á samfélagsmiðlum og athugasemdakerfi myndbandanna. Maðurinn sem tók upp myndbandið sem sýnir níu ára stelpuna í sjónum segir birtingu á því myndbandi vera víti til varnaðar.
Sveinn K. Rúnarsson, yfirlögregluþjónn á Suðurlandi, er einn af þeim hefur ekki mikla trú á myndbirtingum af þessu tagi en segir erfitt að eiga við slíkt.
„Við viljum senda þau skilaboð til fólks sem verður vitni að slysum og óhöppum annarra að muna að það eru manneskjur á bak við hvert atvik, manneskjur sem eiga fjölskyldur og vini sem einnig eru á samfélagsmiðlum. Það má spyrja sig þeirrar spurningar, myndi það vilja sjálft að birtar séu myndir af þeim við slíkar aðstæður, jafnvel á versta tíma lífsins,“ sagði Sveinn um málið við Mannlíf.
„Við þurfum ávallt að muna að á bak við hvern atburð er manneskja og allir þurfa að virða persónulegan rétt þess sem lendir í óhappi eða slysi.“
Hann telur að almenningur eigi ekki að halda uppi forvörnum heldur séu aðrir í þeim verkefnum, sem setji fram efnið á skipulegan hátt.
„Það er miklu frekar hlutverk leikmanna að fylgja þeim forvörnum sem eru til staðar og sýna þannig fram á, með góðu fordæmi hvernig best er að bera sig að á hættulegum slóðum. Ég hef ekki trú á þessari forvörn að sýna hörmungar, sem víti öðrum til varnaðar,“ sagði yfirlögregluþjónninn að lokum.
Athugasemdir