Það kannast kannski ekki margir Íslendingar við nafnið Ívar Örn Sverrisson en hann hefur á undanförnum áratug byggt upp orðspor sitt í leiklistarheimi Noregs. Ívar hóf ferilinn snemma á 21. öldinni á Íslandi þar sem hann lék hlutverk í myndum á borð við Dís, Strákarnir Okkar og Reykjavík Whale Watching Massacre.
Hann hefur nú klárað tökur á norskri sjónvarpsþáttaseríu og er um stærsta hlutverk Ívars á ferlinum að ræða. Sjónvarpsþátturinn heitir I kjærlighetens navn á norsku og In the Name of Love á ensku og verður meðal annars sýndur á streymisveitunni PrimeVideo, sem er í eigu Amazon. Serían verður frumsýnd í byrjun september.
Mannlíf ræddi við Ívar um lífið, sjónvarpsþáttinn og framhaldið.
„Ég var búinn að vinna töluvert á Íslandi og byggja upp ferilinn áður en ég flutti til Noregs en það var út af námi fyrrverandi konunnar minnar,“ segir Ívar um ástæðu þess af hverju hann flutti upphaflega til Noregs. „Þetta var bara svona eins og lífið er, allt í einu er maður á leiðinni til útlanda. Mig langaði svo til að halda áfram með það sem ég var byrjaður á og reyndi ná mér í sambönd. Ég þekkti engan þarna úti og kunni ekki tungumálið en lét slag standa og ætlaði mér að komast inn, bora mig inn.“
Í seríunni hefur Ívar með að eigin sögn með nokkuð stórt hlutverk. „Persónan er hálfíslensk. Hann heitir Þorvaldur, þannig að ég má hafa smá íslenskan hreim. Þeir eiginlega vildu það.“
Sagan er byggð á lífi leikstjórans Bård Breien og teygir sig yfir þrjá áratugi. Faðir leikstjórans var fyrsti klámkóngur Noregs en heima sat móðir hans, sem var mikill femínisti og fór fyrir femínistahreyfingu í sínum frítíma. Samkvæmt Ívari er Þorvaldur sem er eini karlkyns meðlimurinn í femínistahópnum og verður fljótlega ástfanginn af móðurinni, sem skapar erfiðar aðstæður.
En hver eru langtímamarkmið Ívars?
„Ég er búinn að taka ákvarðanir varðandi framtíðina, ég hef verið að vinna svo breitt. Ég hef verið mikið í sviðsleikhúsi og hef ferðast út um allan heim í því. Þannig að ég hef tekið þann pólinn í hæðina að mig langar að einbeita mér að kvikmyndum og sjónvarpi næstu fimm árin. Markmiðið er að geta tekið verkefni víðar en í Noregi,“ en Ívar talar mörg tungumál reiprennandi.
Leikarinn viðurkennir að hugur hans leiti til Hollywood að einhverju leyti.
„Það sem er svo spennandi er að bandaríski markaðurinn ferðast mikið og taka oft bíómyndirnar í öðrum löndum og ég vil algjörlega vera möguleiki þar,“ segir Ívar um Hollywood möguleika sína. „Ég ætla að vera óhræddur að banka á hurðir í Evrópu, Noregi og á Íslandi. Það er svo gaman að sjá að það eru nokkuð margir íslenskir leikarar sem komast í stórar bíómyndir og sjónvarpsþætti. Mig langar að halda áfram að sýna heiminum fleiri íslenska leikara,“ segir Ívar um kvikmyndabransann.
Hann telur að það muni hjálpa honum að seríunni verði streymt á PrimeVideo.
„Mig langar einmitt að nota tækifærið og vera sýnilegur og athuga hvaða möguleika ég hef. Ég er mjög spenntur fyrir því,“ segir leikarinn glaður í bragði.
Ívar er einnig spenntur fyrir því að koma til Íslands að leika. „Ég er mjög stoltur af þeim verkefnum sem ég hef verið þátttakandi í og langar virkilega að gera meira.“
Athugasemdir