Fleiri upplýsingar hafa komið fram um illa farið lík sem fannst í Tesla-bifreið í eigu tónlistarmannsins D4vd en fréttir af líkfundinum bárust á dögunum.
Samkvæmt frétt NBC Los Angeles var líkið greint með réttarmeinafræðilegum aðferðum sem Celeste Rivas, 15 ára.
Dánarorsök hennar hefur ekki verið staðfest að svo stöddu, að því er fram kemur í gögnum dánarorsakaskrifstofu Los Angeles-sýslu sem E! News fékk að sjá. Í skránni er dánardagur skráður 8. september, sama dag og líkið fannst í Tesla-bifreiðinni sem stóð á lóð þar sem bílar eru teknir í vörslu, í Hollywood. Þar kemur jafnframt fram að dánarstaður hafi verið „ökutæki“.
Lögreglan í Riverside-sýslu sagði í yfirlýsingu 17. september að Rivas hefði verið sú stúlka sem tilkynnt var týnd frá Lake Elsinore, um 110 km suðaustur af Los Angeles.
Að sögn lögreglunnar í Los Angeles hefur dánarmeinafræðingur ekki enn gefið út dánarorsök stúlkunnar, hvort um sé að ræða slys, sjálfsvíg eða saknæmt athæfi. „Því höfum við ekki neinar upplýsingar um hugsanlega grunaða,“ sagði talsmaður lögreglunnar.
E! News hefur óskað eftir viðbrögðum frá fulltrúa D4vd en ekki fengið svar. Fyrr hafði talsmaður hans þó sagt að hinn 20 ára tónlistarmaður „vinni að fullu með yfirvöldum“.
Fyrr í september greindu heimildir NBC News frá því að lögregla hefði verið kölluð að bílalóðinni eftir að slæm lykt barst frá bifreiðinni, sem hafði staðið þar í nokkra daga. Þegar bifreiðin var opnuð fannst líkið í farangursrými framan til í bílnum. Í ljós kom að bifreiðin var skráð í Hempstead, Texas, undir réttu nafni söngvarans, David Anthony Burke.
Lögreglan sagði bílinn hafa verið dreginn á lóðina eftir að honum var lagt og hann yfirgefinn í Hollywood Hills.
Í kjölfar þessarar hryllilegu uppgötvunar aflýsti D4vd tónleikum í Seattle 17. september. Samkvæmt upplýsingum á AXS-vefnum stendur þó næsti tónleikadagur enn óbreyttur, á morgun,19. september í San Francisco.
Söngvarinn, sem gerði garðinn frægan með laginu Romantic Homicide, hefur verið í tónleikaferðalagi um Bandaríkin til að kynna fyrstu plötu sína, Withered.
„Þessi plata þýðir SVO mikið fyrir mig. Þið hafið ekki hugmynd um hversu mikla vinnu, blóð, svita og tár tók að skapa þetta verkefni síðustu tvö ár,“ skrifaði hann á Instagram í febrúar. „Ég byrjaði upp á nýtt aftur og aftur þar til ekkert annað var eftir á þessum hljóðræna striga nema hugsanir, laglínur og tilfinningar sem voru óhjákvæmilega ég.“
Athugasemdir