Holly Willoughby játaði að hafa ekið á mann á hlaupahjóli

Holly Willoughby hefur játað sök í því að hafa keyrt mann af raf­hlaupa­hjóli. Hin þriggja barna móðir, 44 ára, ók án nægrar aðgæslu þegar hún lenti á fórn­ar­lamb­inu nærri þriggja millj­óna punda heim­ili sínu í ágúst, að því er fram kom fyrir dómi.

Rétt­ar­höld fóru fram í dag við Lavender Hill hér­aðs­dóm­inn í Lundúnum, en Holly mætti ekki per­sónu­lega. Fyrr­ver­andi þátta­stjórn­andi This Morning ját­aði sök með bréfi vegna akst­urs án nægrar aðgæslu.

Fyr­ir dómnum var sýnt mynd­band þar sem Holly beygir til hægri inn á hlið­ar­götu á svörtum Mini Cooper-bíl sínum, sem met­inn er á 25 þús­und pund, án þess að gefa stefnu­ljós. Þar klessti hún á hvítt Piaggio-hlaupa­hjól sem kom á móti.

Fórn­ar­lambið, sem ekki var nafn­greint, sást kast­ast af hjól­inu þegar það skall á bíl Holly. Hann hlaut brot­inn háls­hryggjar­lið og tábrot við slysið.

Holly var í dag dæmd til að fá sex stig á öku­skír­teinið sitt og greiða sekt upp á 1.653 pund eða um 280.000 krónur . Einnig var henni gert að greiða 130 pund í máls­með­ferð­ar­kostnað og 661 pund í miska­bætur.

Verjandi hennar, Aisling Byrnes, sagði að sjón­varps­konan hefði lent í því að „taka ranga ákvörðun eitt augna­blik“, og bætti við: „Henni þykir þetta mjög miður“.

„Þetta var hvorki vegna hraðakst­urs né vegna slæmra veð­ur­skil­yrða. Þetta voru ein­fald­lega mis­tök sem eru mjög ólík henni; hún hefur hreint saka­vott­orð í umferð­inni og er almennt afburð­ar­góð mann­eskja. Hún harmar þetta mjög, hún steig út úr bílnum, bauð honum sím­ann sinn og vatn og var á vett­vangi þar til sjúkra­liðar komu.“

Sak­sókn­ari máls­ins, Ger­aldine Dickinson, sagði hins vegar: „Sak­born­ingur ók [Mini-bílnum] í Barnes. Ætlunin var að beygja til hægri, sem hún gerði án þess að gefa stefnu­ljós, og hjólandi mað­ur­inn kastað­ist af hjól­inu. Hann hlaut C7 hrygg­brotsá­verka og brotna tá. Ég hef yfir­lýs­ingu frá fórn­ar­lamb­inu. Hann var á hvítu Piaggio-hjóli, um 180 metrum frá rauðu umferð­ar­ljósi.“

Í yfir­lýs­ingu fórn­ar­lambs­ins segir: „Ég ók á um 20 mph hraða og var byrj­aður að hægja á mér til að stöðva. Þegar ég var sam­síða svörtum Mini Cooper-bílnum beygði öku­mað­ur­inn til hægri án þess að gefa stefnu­ljós til að fara inn á göt­una. Þetta olli því að ég kastað­ist í göt­una.“

Dómarinn, David Charnley, sagði við upp­kvaðn­ingu dóms: „Baldwin (eig­in­nafn eig­in­manns hennar) hefur játað sök við fyrsta tæki­færi vegna akst­urs án nægrar aðgæslu. Það var hvorki notað stefnu­ljós né virð­ast speglar hafa verið skoð­aðir, eða af ein­hverjum ástæðum sá Baldwin ekki hlaupa­hjóla­mann­inn.“

Málið kemur upp á sama tíma og fregnir herma að Holly sé að und­ir­búa end­ur­komu í sjón­varp eftir að hafa hætt í This Morning fyrir tveimur árum.

Nýjustu verk­efni hennar hafa meðal ann­ars verið You Bet! með Stephen Mulhern, sem hún hætti í í mars, og Celebrity Bear Hunt með Bear Grylls, sýnt á Netflix, sem var síðan lagt af á þessu ári.

Raun­veru­leika­þátt­ur­inn Dancing On Ice var einnig lagður af af ITV á þessu ári, sem þýðir að Holly er án þátta­stjórn­unar í fyrsta sinn í yfir 20 ár.