Sjóðurinn AF3, sem er í rekstri Alfa Framtaks, hefur náð samkomulagi við Orkla Snacks um kaup á öllu hlutafé í Nóa Síríus. Með kaupunum verður fyrirtækið á ný í íslenskri eigu eftir að hafa verið um tíma í eigu hins norska Orkla. Gert er ráð fyrir að viðskiptin þurfi samþykki Samkeppniseftirlitsins áður en þau ganga í gegn.
Frá þessu er greint í tilkynningu, sem mbl.is sagði frá.
Í henni segir meðal annars: „Nói Síríus hf. var stofnað árið 1920 og er eitt þekktasta framleiðslu- og markaðsfyrirtæki landsins. Fyrirtækið hefur frá stofnun sinnt framleiðslu og dreifingu á súkkulaði og öðrum matvörum. Orkla Snacks hefur umbreytt fyrirtækinu úr rótgrónu fjölskyldufyrirtæki í framsýnt framleiðslufyrirtæki með skýra áherslu á gæði og sterk vörumerki. Alfa Framtak mun geta byggt á þessum sterka grunni og stutt við næsta vaxtarskeið félagsins.“
Einnig kemur fram að Alfa Framtak sérhæfi sig í rekstri fjárfestingasjóða og hafi víðtæka reynslu af því að styðja fyrirtæki í vexti og breytingum.
„Markmið Alfa Framtaks er að hámarka verðmæti fjárfestinga og skila fyrirtækjum af sér í betra ástandi við sölu og þannig skilja eftir sig jákvæð fótspor í íslensku viðskiptalífi. Í dag eru þrír sjóðir í rekstri Alfa Framtaks þ.e. AF1, AF2 og AF3. Áskriftarloforð eru samtals um 45 milljarðar króna,“ segir enn fremur í tilkynningunni.
Fyrirtækjaráðgjöf Landsbankans og LOGOS veittu seljanda ráðgjöf við viðskiptin, en fyrir hönd kaupanda komu að málinu BBA//FJELDCO og KPMG.
Athugasemdir