Karlmaður hefur verið dæmdur í fangelsi fyrir líkamsárás en málið var tekið fyrir í Héraðsdómi Vesturlands.
Hann var ákærður fyrir brot í nánu sambandi og gegn barnaverndarlögum með því að hafa árið 2025 veist að syni sínum og tekið með báðum höndum um háls hans og höfuð og hrist hann til og með þessu ógnað lífi, heilsu eða velferð hans og með þessu jafnframt sýnt af sér ósiðlegt og ruddalegt athæfi gagnvart drengnum.
Faðirinn var einnig ákærður fyrir að hafa veist að dóttur sinni og tekið um hendur hennar, haldið þeim og kreist þær og með þessu ógnað lífi, heilsu eða velferð hennar og með þessu jafnframt sýnt af sér ósiðlegt og ruddalegt athæfi gagnvart stúlkunni.
Samkvæmt dómnum var maðurinn drukkinn þegar atvikið átti sér stað. Hann viðurkenndi að hafa farið yfir strikið, eins og það er orðað í dómnum, en var ósáttur við þá fullyrðingu að hann hafi hrist börnin. Það myndi sjást á börnunum ef hann myndi gera slíkt.
Hann segist hafa lent í útistöðum við þáverandi sambýliskonu sína og börnin reynt að stía þeim í sundur.
Samkvæmt dómum hefur hann áður verið dæmdur fyrir að brjóta gegn börnum sínum og sambýliskonu. Einnig hefur hann verið dæmdur fyrir vopnalagabrot.
„Brotin eru að mati dómsins alvarleg og ófyrirleitin gagnvart börnum ákærða inni á heimili þeirra sem á að vera þeim griðastaður. Að auki verður að horfa til þess að brotin eru framin, og skilorð þar með rofið, einungis rétt um þremur mánuðum eftir að fyrri dómur féll.“
Pabbinn var dæmdur í þriggja mánaða fangelsi en sá dómur er skilorðsbundinn til tveggja ára. Þá þarf hann að greiða syni sínum 400 þúsund krónur auk vaxta og dóttur sinni 300 þúsund krónur.
Athugasemdir