Nítján ára gamall maður hefur verið dæmdur í 28 mánaða fangelsi fyrir alvarleg brot gegn unglingsstúlku sem hann kynntist á internetinu.
Maðurinn, Carlo Tritta, komst í samband við stúlkuna í gegnum netleiknum Roblox og færði samskiptin síðar yfir á aðra miðla. Hann hélt uppi reglulegum samskiptum við hana um tíma, þrátt fyrir að hún væri undir lögaldri. Hann lét hana trúa því að þau væru í sambandi, sendi henni gjafir og skyndibita og hringdi stöðugt í hana eða sendi henni skilaboð, að sögn lögreglunnar í Hampshire.
Málið kom upp þegar móðir stúlkunnar varð vör við samskiptin og hafði samband við lögreglu í ágúst 2025. Tritta var í kjölfarið handtekinn og síðar látinn laus gegn skilyrðum um að hafa ekki samband við stúlkuna eða fjölskyldu hennar á meðan rannsókn stóð yfir.
Samkvæmt gögnum málsins braut hann þau skilyrði ítrekað og hélt áfram tilraunum til að ná sambandi. Áráttuhegðun Tritta stigmagnaðist þegar hann tilkynnti móður stúlkunnar til barnaverndar og hafði samband við lögregluna í tilraun til að fá rannsóknarlögreglumanninn fjarlægðan frá málinu.
Hann ferðaðist einnig langa vegalengd að heimili stúlkunnar í Manchester og kom þar óboðinn inn um bakdyrnar. Þegar stúlkan, sem var skelfingu lostin, áttaði sig á því að hann hafði laumast inn í hús hennar, sagði hún honum að fara, sem hann gerði fyrst, en kom svo aftur tíu mínútum síðar til að krefjast nýja símanúmersins hennar, sem hún neitaði að gefa honum. Stúlkan samþykkti þá að fara á staðbundinn krá með Tritta bara til að fá hann burt frá húsinu. Morguninn eftir var móðir stúlkunnar að setja ruslatunnurnar út þegar hún sá Tritta fela sig bak við bílskúr. Hún réðst á hann sem varð til þess að hann hljóp á brott áður en lögreglan var kölluð til.
Tritta var handtekinn og ákærður fyrir að raska réttvísinni, sem hann játaði fyrir dómi og hann var dæmdur í 12 mánaða skilorðsbundinn dóm þann 11. desember.
Þremur dögum síðar ferðaðist hann aftur til Manchester og fór inn á heimili stúlkunnar enn á ný þar sem hann stóð frammi fyrir henni og móður hennar áður en hann skemmdi eftirlitsmyndavél.
Hann var handtekinn og ákærður fyrir að hafa tvisvar hótað vitnum og fyrir að valda eignaspjöllum. Byggt á efni sem lögreglan fann í síma hans, sem hafði verið gert upptækt áður, var hann einnig ákærður fyrir þrjú tilvik af því að hafa tekið ósæmilegar myndir af barni, átt í kynferðislegum samskiptum við barn og látið barn á aldrinum 13-15 ára horfa á kynferðislegar myndir.
Tritta játaði sök fyrir dómi og var úrskurðaður í gæsluvarðhald þar til dómur féll. Dómur var kveðinn upp við Manchester Minshull Street Crown Court í dag, þar sem hann var dæmdur í 28 mánaða fangelsi.
Rannsóknarlögreglukona í málinu sagði að atvikið undirstrikaði hættur sem geta fylgt samskiptum á netinu, sérstaklega fyrir ungt fólk. Hún hvatti foreldra til að ræða við börn sín um netnotkun og vera vakandi
fyrir mögulegum áhættum.
„Tölvuleikjavettvangar ættu að vera rými þar sem fólk, sérstaklega börn, er öruggt. Nafnleysi internetsins gerir hættulegum einstaklingum eins og Tritta kleift að nýta sér aðra í eigin þágu og það er hneykslanlegt hversu langt Tritta gekk til að viðhalda misnotkun sinni á þessari ungu stúlku. Stúlkan og móðir hennar eiga báðar hrós skilið fyrir hugrekki sitt sem nú hefur leitt til þess að Tritta hefur verið skellt í fangelsi. Ég hvet foreldra til að ræða opinskátt við börn sín um hvernig þau nota internetið og ef þið hafið einhverjar áhyggjur, treystið þá innsæi ykkar og tilkynnið það til lögreglu.“
Athugasemdir