Grizz Chapman, sem var hvað þekktastur fyrir hlutverk sitt sem lífvörðurinn Grizz í sjónvarpsþáttunum 30 Rock, er látinn, 52 ára að aldri.
Talskona hans, Saideh A. Brown, staðfesti andlátið við TMZ og sagði Chapman hafa látist 22. maí.
Frændi hans, Donte Harrison, betur þekktur sem „Hammer“ hjá Harlem Globetrotters, greindi frá því á Instagram að Chapman hefði glímt lengi við veikindi og gengist undir skilunarmeðferð.
„Eftir margra ára baráttu við veikindi og skilun lést hann friðsamlega í svefni sínum 22. maí 2026,“ skrifaði Harrison við gamla mynd af þeim frændum.
Chapman hafði áður rætt opinberlega um nýrnasjúkdóm sinn sem leiddi til þess að hann fékk nýrnaígræðslu árið 2010. Sama ár varð hann talsmaður National Kidney Foundation.
Harrison minntist einnig arfleifðar leikarans.
„Lífið lagði þungar byrðar á frænda minn Grizz Chapman, en hann barðist við þær af styrk og reisn allt til enda,“ skrifaði hann.
„Margir þekktu hann sem grínleikarann úr 30 Rock, en við þekktum manninn á bak við skjáinn. Góðhjartaðan mann með góða orku sem hafði áhrif á líf fólks.“
„Hvíl í friði, frændi,“ bætti hann við. „Nafn þitt og arfleifð munu lifa að eilífu.“
Chapman lætur eftir sig eiginkonu og tvö börn.
Chapman hóf feril sinn í 30 Rock eftir að hafa kynnst mótleikara sínum Tracy Morgan þegar hann starfaði sem dyravörður á næturklúbbi í New York. Eftir að hafa vingast við grínistann lék Chapman einn af traustum fylgdarmönnum hinnar skálduðu persónu Tracy Jordan ásamt Kevin Brown, sem lék Dot Com.
Í viðtali árið 2012 sagði Chapman að hann hefði þurft að hafa mikið fyrir hlutverkinu.
„Margir halda að ég hafi sjálfkrafa fengið hlutverkið af því að Tracy og ég vorum vinir. En ég vann hart fyrir þessu,“ sagði hann.
Chapman lék síðar í þáttum á borð við The Blacklist og Blue Bloods auk kvikmyndarinnar Money Monster og eigin YouTube-seríu.
Hann ræddi þó einnig opinskátt um erfiðleika við að fá hlutverk í Hollywood.
„Ég heyri oft: „Við vitum ekki hvernig við eigum að markaðssetja þig“ eða „Þú ert of stór.“ Eða: ‘Við erum nú þegar með einn eins og þig“,“ sagði hann í viðtali við The Hollywood Reporter árið 2012.
„En þið eigið ekki neinn eins og mig. Þið eigið ekki sjö feta háan, elskulegan mann. Þið eigið það ekki.“
Athugasemdir