Sigurgeir Svanbergsson hefur undanfarnar vikur undirbúið sig af krafti fyrir það sem gæti orðið sögulegt afrek þegar hann hyggst synda alla leið niður Lagarfljót. Áætlað er að sundið fari fram í annarri viku júní og hefur enginn áður reynt slíkt afrek.
Upphaflega stóð til að leggja af stað í lok maí eða byrjun júní, en Sigurgeir segir fjölskyldulífið hafa haft áhrif á tímasetninguna.
„Eins og svo oft áður fór ég aðeins fram úr mér með dagsetningar,“ segir hann í samtali við Austurfrétt og bætir við að eiginkona hans, Sóley, hafi bent honum á að dóttir þeirra eigi afmæli 1. júní.
„Það væri mjög óhentugt ef ég myndi synda rétt fyrir það og vera gjörsamlega gagnslaus í undirbúningi afmælisins og á afmælisdaginn sjálfan,“ segir Sigurgeir og viðurkennir að hann yrði líklega „verra en gagnslaus“ eftir slíkt þrekvirki og bætir við: „Og yrði auka byrði fyrir Sóley sem væri þá sjálf ný búin að halda sér vakandi í rúmlega sólarhring til að sjá til þess að klikkaði maðurinn hennar gæti svamlað um Lagarfljótið áfallalaust.“
Hann segir undirbúninginn hingað til hafa gengið afar vel, með sérstaka áherslu á sundtækni og orkunýtingu, enda um gríðarlega vegalengd að ræða. Frá Fljótsdal niður að Lagarfossvirkjun eru nærri 60 kílómetrar.
Líkt og í fyrri sundum sínum mun Sigurgeir synda til styrktar Píeta-samtökin og fær aðstoð frá Björgunarsveitin Brimrún meðan á sundinu stendur.
Þá stefnir hann einnig á að halda sérstakt móttökupartý við endastöðina fyrir þá sem vilja fylgjast með þegar hann kemur í land eftir sundið.
„Þetta verður söguleg stund í íslenskum afreksíþróttum ef þetta tekst,“ segir Sigurgeir.
Athugasemdir